Экономика

Бизни къыралда агъачланы эркинликсиз къырыу  бу мюлкде бек уллу проблемалагъа келтирген жарсыулу ишледен бириди дерчады. Аны  хатасындан кийик жаныуарланы, къанатлыланы саны азаяды, хауаны къурамы да тюрленеди. Аны себепли КъМР-ни Табийгъат байлыкъла эмда экология министерствосу ол жаны бла  жууаплылыкъны юсюнден къайтарып эсгертеди.
Закон бла  отун хазырларгъа  эркинлик республиканы Агъач планына эмда агъач мюлклени регламентлерине тийишлиликде бериледи.

Россейни Банкы ключевой ставканы азайтханны, къыралда ахча-кредит политика къалай бардырылгъаныны, инфляцияны не затла тюрлендиргенлерини эмда бизни регионда аны ёлчемини юсюнден сёлешгендиле бу кюнледе финанс учрежденияны Къабарты-Малкъарда бёлюмюнде бардырылгъан жыйылыуда. Анга республиканы власть органларыны, кредит организацияланы, илму жамауатны келечилери, бизнесменле къатышхандыла, деп билдиргендиле банкны пресс-службасындан.

Жыл башланнганлы Къабарты-Малкъарда газ баргъан ызлагъа эркинликсиз къошулгъанлары ючюн жюзден аслам адам уголовный жууапха тартылгъандыла, деп билдиредиле  «Газпром межрегионгаз Нальчик» компанияны пресс-службасындан.

РФ-ни Экономиканы айнытыу министерствосу  быйыл экинчи кварталда  регионлада  Къырал эм муниципал  жумушланы тамамлагъан кёп функциялы  араланы (МФЦ)  ишлерин эсеплерча   рейтинг бардыргъанды.  Аны  чеклеринде   онеки тюрлю шартха эс бурулгъанды. Алагъа кёре   Къабарты-Малкъарны учреждениясы  92 процентден аслам  алып эм тири ишлеген  регионланы  тизмесине киргенди.

«Россети Шимал Кавказ» компанияны Къабарты-Малкъарда бёлюмю – «Каббалкэнерго» быйыл ал сегиз айыны ичинде тюрлю-тюрлю бюджетлеге налогла бла кёп къалмай 55 миллион сом тёлегенди, андан республиканы эмда жер-жерли бюджетлеге 0,19 миллион сом бёлюннгенди, деп билдиргендиле аны пресс-службасындан.

Бахсан  районда тёрели эм терк айныгъан  терек бахчалада  саулай да 2693 гектарда къыстау алманы жыядыла. Тирликни асламысы уллу сурам болгъан «Гала», «Редчиф», «Ред Джонапринц» эм «Джеромини» сортлададыла, деп билдиредиле муниципалитетни  администрациясыны пресс-службасындан.

Жер къайда да эм магъаналы табийгъат байлыкъгъа саналады. Эл мюлкде производствону эмда адамны жашау болумуну экономиканы жаны бла мурдору да олду.

Быйыл жайда Къабарты-Малкъарны  Предпринимательствогъа себеплик этиу арасында Россейни гитче эмда орта предпринимательствогъа билеклик этген банкыны («МСП банк) бёлюмю ачылгъанды, деп билдиргендиле КъМР-ни Экономиканы айнытыу министерствосундан. Бу финанс учрежденияны 1999 жылда РФ-ни «МСП» корпорациясы къурагъанды.

Предпринимательство бла кюрешгенле налогланы  тынч амал бла  тёлеу система болгъанын биледиле. Кёпле ишлерин анга тийишлиликде бардырадыла. Энди уа алагъа аны бютюн женгил этгендиле. Федерал налог службадан билдиргенлерине кёре, ишлеринде онлайн-кассаланы хайырланыучу предпринимательле келир жылдан башлап  отчётланы кёп къалмай барындан да эркин этилликдиле. Ала тёлерик налогну, сагъынылгъан кассаладан келген информацияны  ФНС кеси тийишдирип тергерикди, ызы бла билдириу да жиберликди.

 Бизни республикада быйыл жети айны ичинде ток ючюн тёлемей тургъан 23,2 минг адамны эмда предприятияланы бла организацияланы ансыз къояргъа умут этген эдиле «Каббалкэнергода». Андан билдиргенлерине кёре, бу абонентлени барыны да 354 миллион сом берликлери барды.