Экономиканы бюгюннгю болумун тинтиуге – энчи эс

Россейни Банкы ключевой ставканы азайтханны, къыралда ахча-кредит политика къалай бардырылгъаныны, инфляцияны не затла тюрлендиргенлерини эмда бизни регионда аны ёлчемини юсюнден сёлешгендиле бу кюнледе финанс учрежденияны Къабарты-Малкъарда бёлюмюнде бардырылгъан жыйылыуда. Анга республиканы власть органларыны, кредит организацияланы, илму жамауатны келечилери, бизнесменле къатышхандыла, деп билдиргендиле банкны пресс-службасындан.

«Ключевой ставка къыралны бар экономикасын тюрлендирирге боллукъ кёрюмдюге саналады. Россейни Банкы аны кёбейтирге неда азайтыргъа оноу этерден алгъа экономикада болумну терен тинтеди, базманнга салмай бир атлам да этмейди», - дегенди финанс учрежденияны ахча-кредит политика Департаментини таматасыны орунбасары Андрей Липин.

КъМР-ни Правительствосуну Председателини биринчи орунбасары Мурат Керефов, ключевой ставканы тюрлендирирден алгъа инвестицияланы тирилтиуню эмда инфляцияны тыйыуну эсге алып, хар жаны бла да хайырлы оноу эте билирге кереклисине бийик магъана бергенди. «Ол бары да къыралны эмда регионланы экономикаларыны мурдоруду», - деп чертгенди.

Банкны экспертлери бизни республикада экономиканы болумун терен тинтиуге энчи эс бургъандыла. Финанс учрежденияны КъМР-де бёлюмюню башчысы Анатолий Тхамоков оюм этгеннге кёре, хар регионну кесини энчиликлери барды, алада экономика да бирча тюйюлдю. Ол себепден инфляцияны, экономикада тириликни, башха кёрюмдюлени да сюзюп, прогнозун эте турургъа тийишлиди.