Календарь событий

   Бизни республикадан «Инаркой» футбол команда ОНФ-ни «Уличный красава» акциясында хорлагъанды.  Жашчыкъла, 16-17-жыллыкъланы араларында финалгъа чыгъып, Кемерово областьны «Сатурн» командасы бла Сочиде «Фишт» стадионда ойнагъандыла. Бу сермешде бизникиле кючлюрек болгъандыла. 14-15-жыллыкъланы къауумунда уа Камчатка крайны командасы хорлагъанды.
   Акциягъа къыралдан 3420 арбаз команда къатышхан эди. Аладан бек кючлюле бизникиле болгъанлары уа бютюн къууандырады. 

Элбрус районда Сабийлени чыгъармачылыкъларын айнытыуну Мокъаланы Магомет атлы ара къуралгъанлы 65 жыл болгъанды. Ол кезиуню ичинде учреждение дайым ёсюуню жолу бла барады, бир ненча минг сабийни кесине тартханды, аны чыгъармачылыкъ къауумларына кирген кёплеге артда усталыкъ сайларгъа амал бергенди. 

           Бу кюнледе Искусстволаны Шимал-Кавказ къырал  институтунда КъМР-ни халкъ поэти, жазыучу, кёчюрмечи, Россейни поэзия академиясыны член-корреспонденти Гуртуланы Солтанбекни жашы Салихни  «Эльбрус» китап басмада чыкъгъан бештомлукъ назму жыйымдыгъыны  презентациясы болгъанды. Чыгъарма поэтни 80-жыллыгъына жораланып  дуния жарыгъын кёргенди.  Аны  РФ-ни эмда КъМР-ни Культура министерстволары, сагъынылгъан  институт эмда КъМР-де «Патриот» жаш тёлю  жамауат организация «Республика хазна» атлы проектге тийишлиликде  къурагъандыла.

     Долинскде "Синдика" къонакъ юйде  "Адамны ариулу эмда саулугъу бла байламлы  проблемаланы кетериу"  деген  битеуроссей  форум  бардырылгъанды. Аны  КъМР-ни Саулукъ сакълау министерствосу, Къабарты-Малкъар къырал университет,  Шимал Кавказда  жаякъ-бет, пластика хирургия эм стоматология илму-практика ара эмда КъМР-ни стоматологларыны  регион жамауат организациясы къурагъандыла. Анга Москвадан, Санкт-Петербургдан, Саратовдан, Дондагъы Ростовдан, Италиядан, Дагъыстандан да белгили врачла, косметологла, стоматологла  да келгендиле. 

 Алгъаракълада белгили тарыхчыбыз Мызыланы Исмайылны Малкъар ауузуну юсюнден статьясын басмалагъанбыз. Бюгюн аны Чегем тарыны юсюнден жазгъанлары бла шагъырей этебиз.

         Къабарты-Малкъарда быйыл озгъан тогъуз айны ичинде Роспотребнадзор тенгиз продукция сатхан 62 тюкенни тинтгенди. Аладан 29-нда тюрлю-тюрлю бузукълукъла табылгъандыла. Чабакъ сатхан тюкенледе санитар-техника болум жорукълагъа келишмегени, продукция тийишлисича сакъланмагъаны, алыучулагъа тюз  информация берилмегени эмда башха кемчиликле  ачыкъланнгандыла.

Къабарты-Малкъарны Къурулуш эмда жол мюлк министерствосуну пресс-службасындан билдиргенлерине кёре, «Малка – Ингушли» жолгъа тынгылы ремонт этилип бошалгъанды. 
Тапландырыу  ишле быйыл жаз башында башланнгандыла. Аны чеклеринде жолну онеки  километрден асламында индеклени,  арыкъланы жангыртхандыла, кыртышла тап халгъа келтирилгендиле эм асфальт салыннганды. 

Россельхознадзорну КъМР-де эмда Шимал Осетия-Аланияда управлениясы бла Къабарты-Малкъар Республикада предпринимательлени эркинликлерин къоруулау жаны бла уполномоченный бирге ишлеуню юсюнден келишим этгендиле. Тийишли документге Управленияны башчысы Рустам Абдулхаликов бла Уполномоченный Юрий Афасижев къол салгъандыла.

Сбербанкны Къабарты-Малкъарда бёлюмюнден билдиргенлерине кёре, энди абери сатып алыргъа кредитлени жетмиш жыллары толмагъанла да алыргъа боллукъдула. Ол кеси да залогсуз берилликди.
Ары дери уа аллай ёнкючню инсаннга 65 жылы толгъунчу бергендиле. Кредитни банкны офислеринде неда «Сбербанк Онлайн» системада жарашдырыргъа боллукъду.

РусГидро компанияны Къабарты-Малкъарда бёлюмю алгъаракълада «Рождённые энергией» деген тёрели жандауурлукъ акцияны бардыргъанды. Аны кезиуюнде энергетикле Урван бла Прохладна районланы ара больницаларына жангы медицина оборудование бергендиле, деп билдиргендиле бёлюмню пресс-службасындан.

     «Россейни предприниматель тиширыуларыны ассоциациясы" Битеуроссей жамауат организацияны Къабарты-Малкъарда регион бёлюмю ишини эсеплерин чыгъаргъанды. Анга аталгъан жыйылыу «Акрополь» арада бардырылгъанды. 

Жылны ахырында Хасанияны Маданият юйюнде бет жарыкълы  уруннган  эллилеге байрам къурау ахшы тёреге айланнганы. Быйыл да алай болгъанды. Озгъан байрым кюн ингирликде Маданият юйню уллу залында  адамла асыры кёпден, олтурур угъай да, сюелир жер окъуна жокъ эди. 
 Хасаниячыланы  келе тургъан жангы жыл бла алгъышларгъа элни администрациясыны башчысы Азаматланы Къайсын, КъМР-ни Муслийманларыны дин управлениясыны  таматасыны орунбасары Мисирланы Хызыр, КъМР-ни  курортла эм туризм министрини орунбасары  Суммайланы Ахмат, дагъыда башхала  келген эдиле. 

Къабарты-Малкъар саулукълары осал болгъанланы, сакъатланы реабилитацияларыны системасын къураргъа федерал субсидия берилген 18 регионну арасына киргенди. 

Къабарты-Малкъар Республиканы Парламентини

                                              Бегими

    Къабарты-Малкъар Республиканы Парламенти бегим этеди:
    1.«Къабарты-Малкъар Республиканы жарашдырыучу судьяларыны юсюнден» Къабарты-Малкъар Республиканы Законуна тюзетиуле кийириуню юсюнден» Къабарты-Малкъар Республиканы законуну сюзюуге Къабарты-Малкъар Республиканы Парламентини Законлукъ эмда право низам жаны бла комитети берген проектин биринчи окъулууунда къабыл кёрюрге.

  КъМР-ни Къоркъуулу болумланы тохтатыу эм аланы хаталарын кетериу эмда от тюшюуден сакъланыу жаны бла комиссиясыны кезиулю жыйылыуунда Жангы жылны байрамларында эмда аладан сора солуу кезиуде социал объектле, адамла кёп санда жыйылгъан жерле жамауат тынчлыкъны жалчытыргъа къалай хазырланнганлары сюзюлгенди.  Аны премьер-министрни орунбасары, инфраструктура эм цифралы айныуну министри - комиссияны башчысыны орунбасары Владимир Болотоков бардыргъанды.