Хар бири да ыспасха тийишлиле

     Отряд битеу Къабарты-Малкъар ючюн жууаплыды. Мында туристле солугъан жерлени саны 57-ге жетеди, алада къоркъуусузлукъгъа 7 отряд къарайдыла. Къутхарыу ишлени бардыргъанда ала байламлыкъланы «Приэльбрусье» миллет парк, МВД-ны бёлюмлери, МЧС-ни Баш управлениясы, «Нальчик» аэропорт, катастрофаланы медицинасы бла жюрютедиле. Отрядны асламысы Терс-Къолда турадыла, къалгъанлары Нальчикде, Адыл сууда бла Адыр суудадыла. Канат жоллада ишлеген къутхарыучула энчи юйрениулени ётгендиле.

 Жыл сайын Минги тауда лыжала бла учаргъа Россейден, тыш къыралладан да аслам адам келеди. Быйыл аланы саны 15600 болгъанды, тыш къыраллы къонакъла уа 4193 инсан эдиле. 2018 жылда отряд 106 излеу-къутхарыу операция бардыргъанды, аланы асламысында бийикликледе, къыйын жерледе Минги таугъа бла Баш Кавказ таугъа ёрлерге чыкъгъанлагъа болушлукъ этилгенди.

     

Службада уруннган адамланы бийик усталыкъларын, ишлерине кертичиликлерин да белгилерге тийишлиди. Аладан ючюсюне «Россейни сыйлы къутхарыучусу» деген ат берилгенди, тёртеулен халкъла аралы даражалы къутхарыучуладыла, асламысыны биринчи категориялары барды. Ала лыжалада уста учадыла, таулагъа, къаялагъа ёрлейдиле. Ол барысы да 4-5 минг метр бийикликледе, къыйын жерледе, сууукълада, желледе адамланы табаргъа болушады. Кинологла итлери бла куртланы тюплеринде къалгъанланы чыгъарадыла. Къутхарыу ишле бир ненча кюннге да созулуучудула, аны ючюн бу усталыкъны жигит, палахха тюшгенни сакълар ючюн жанларын аямазлыкъ адамла сайлайдыла. 

      Жылны ичинде службаны ишчилери къутхарыу операцияланы кезиулеринде кёргюзтген бийик усталыкълары эм кишиликлери ючюн дайым саугъаланнгандыла. Бу кюнледе уа отрядны башчысы Гюлюйланы Абдуллах «Ата журтуну аллында къыйыны ючюн» майдалны ордени, биринчи даражалы къутхарыучу Шауаланы Мухтар «Ёле тургъанланы къутхаргъаны ючюн» майдал бла белгиленнгендиле. Отрядны башчысыны орунбасары Хаджиланы Альбертге уа «Россейни сыйлы къуллукъчусу» деген ат берилгенди. 

     Гюлюйланы Абдуллах айтханнга кёре, 2018 жылда кёп къутхарыу ишлеге Шауаланы Азамат, Джаппуланы Адамей, Александр Коляс, Гюлюйланы Мухаммат, Апсуаланы Адамей,  Цезарь Квициани, Джуппуланы Мухаммат, Жеттейланы Исмайыл, Жарашууланы Ахмат, Байдаланы Къууанч, Бека Цинбильяни, кинолог Тимур Бифов къатышхандыла. «Ыспасха уа хар къутхарыучубуз, отрядыбыз саулай да тийишлидиле, ала быйыл да, хар замандача, ахшы ишлегендиле», - дегенди ол. 

 

Суратлада:  Къыйын болумгъа тюшгеннге болушуу; Гюлюйланы Абдуллах; .