Аш оруннга себеплик этеди

Лимонну, ол къошулгъан сууну, чайны да кёпле сюедиле. Аны адамны саулугъуна хайыры аслам болгъанын врачла да белгилейдиле. Эрттенликде къоба келгенлей, алыкъа ауузланнгынчы жылымдыкъ лимон сууну ичсе (аш орунлары бла байламлы жарсыулары болмагъанлагъа), алай бла аш орун толгъанча болады эмда азыкъны кёп ашамазгъа себеплик этеди. Андан да бег а ол амал аш эритиучю системада рак ауруу къозгъалмазына да себепликди. Эсгерте кетейик, ол аурууну жаратылмазына дагъыда  гранат, гуанабана да жарайдыла.

Лимонну аш эритиучю системагъа хайырлылыгъын айтхан заманда, белгилегенибизча, ол къошулгъан сууну эрттенликде тургъанлай ичерге керек болады. Ол ашны эритирге иги болушлукъ этеди. Дагъыда лимон, ётню, бауурну да иги ишлетеди, адамны чархында жыйылгъан токсинлени кетереди. Нек дегенде, бу кёгетни къурамында д-лимонен деген антиоксиданты барды. Ол а, андан сора да, адамны, териси саулукълу болурча этеди.

Болсада лимон сууну иче туруп, аны кислотасы тишлеге заран келтирирге боллугъун унутмагъыз, ол аланы эмальларына алай иги да тюйюлдю. Аны ичгенден сора ауузугъузну таза суу бла чайкъагъыз, огъесе тишлеригизни жууугъуз. Алма ашаса да, аллай амал бар эсе, ол да тишлени сакъларгъа болушлукъ боллукъду. Андан сора да, аш орунда лимонну кислотасы жыйылып, артда сохуран къыйнамаз ючюн, аны мардадан кёп хайырланыргъа керек тюйюлдю.