Адамны ариулугъу ич дуниясы бла къаты байламлыды

Неди ариулукъ? Адамны нюрю? Ышаргъаны? Огъурсузла уа боламыдыла ариула? Табийгъат саугъалагъан сыфатны къалай сакъларгъа керекди терк бузулуудан? Бу соруулагъа жууап излей, косметолог Хуболланы Мадина бла тюбешгенбиз.

- Баям, бек биринчи осал къылыкъланы юслеринден айтыргъа керекли болур?

- Хау, ала адамны сыфатын бек терк бузадыла, не тап адамны да жаныуар сыфатха кийиредиле. Ариу болама деген бек алгъа къылыгъына къарасын. Ниети таза эсе, башхалагъа хата тюшюрмей, жамауатха къуллукъ эте эсе – ол затла да аны сыфатында белгилинирикдиле.  Къара ниетлилени, таш жюреклилени, огъурсузланы бетлерине къарасанг, элгеннген этесе.  Не ариулукъну юсюнден барлыкъды сора хапар?

- Бетни юсюнден айтханда, кёзле энчи жерни болурла?

- Аланы тёгереклеринде тери терк жыйырылады, нек дегенде, кюлсек, жилясакъ да, ызла къоябыз. Кёзлени къатларында алгъа иничке ызчыкъла, артда уа терен жыйыртмакъла чыгъадыла. Аны сылтауларындан бири кёзле къамагъанда, аланы жумуп турургъа юйренчекликди.

Терини осаллыгъына келтирген ол къылыкъны бир ненча сылтауу барды: жууукъдан кёрюуге жарагъан, алай терс сайланнган кёзлюкле (неда аланы жюрютюрге сюймеу). Ол заманда адам ууакъ затчыкъланы иги кёрюр ючюн, кёзлерин жумуп турургъа керек болады. Заман оза баргъаны бла, бу аны къылыгъына бурулуп къалады.

 Дагъыда бир затны эслегенме: кёпле кюнден къоруулагъан кёзлюклени хайырланмайдыла. Терс этедиле!  Бютюнда суу жагъасында. Ультрафиолетни хатасындан терибиз терк жыйырылады, бютюнда кёз тийреледеги жукъасы. Биз жарыкъ кюнчюкден кёзлерибизни жумсакъ, ол жыйырылгъанчыкъла терибизге сингип къалгъанчадыла.

Терини тап халда тутарча, коллаген бла кремле эмда женгил гимнастика (къарамны солдан-онгнга, онгдан-солгъа, энишге-ёрге бургъан) болушурукъдула.

 - Солууубузну ариу этебиз деп, «Орбитни» чайнау мардагъа киргенди. Чёплеуню да чёплейбиз. Бу къылыкъла бетни тюрлендире болурла?

– Сёзсюз. Тохтамагъанлай бир зат чайнап неда чёплеу чёплеп туруу жаланда аш эритиу системагъа угъай, бурунну бла эринлени тийирелеринде териге да хайырлы тюйюлдю – сингирле созуладыла,  бошланадыла, тери жыйырылады.

Алай бла чёплеу ууучну неда чертлеуюклени къолугъузгъа къуярдан алгъа бираз сагъыш этигиз. Нерваларыгъызны тынчайтыргъа аладан эсе женгил гимнастика бла терен-терен солуп жайыкъгъан ахшыды.

- Терини тазалагъан сютчюкле, скрабла, сапынла…ышылып тургъандан да къартая болур ол?

- Терибиз замандан заманнга тазалауну излейди. Алай бу жаны бла артыкъ кюрешиу да иги тюйюлдю. Скрабланы ыйыкъгъа бир кереден кёп хайырланса, ол эпидермисге заран тюшюреди. Тери жукъгъан аурууланы терк тутаргъа боллукъду, кюнде кюйген да  ариу бир тюрсюнлю тюшмейди, къартайыу да теркленеди.

Скрабланы сайлагъанда эслилик керекди.  Аллергиялы териге жемиш кислотала киргенлени жакъмагъыз. Терини ууакъ габулугъундан тазалагъандан сора, крем жакъмай къоймагъыз.

- Терини жашлыгъына себеплик этген  кремлени юслеринден айтсагъыз эди?

- Жаш тиширыуланы эм уллу халатларындан бири – терини жашлыгъына себеплик этген кремлени отуз беш жылларына дери жагъып тебиреудю. Хар жыл саннга кесине жарашхан, келишген кремлери болады.  Жыйырма бешге дери женгил тоникле бла кремле (сууукъ кезиуде аланы къоруулау кючлери болгъанлары изленедиле), отуз бешге дери – бакъгъан къарыулары болгъан кремле бла антистресс косметика.

Лифтинглени къыркъ жылгъа жете келгенде кийирирге тийишлиди – ол кезиуде коллагенни чыгъарылыуу азайгъаныны сылтауундан. Косметиканы жыл санына кёре хайырланмау аны терк къартайыууна себепди. Сёзге, эр кишиледе да тюз алайды.

- Мен эслегенме: сабийликлеринде гимнастика неда тепсеу кружоклагъа жюрюгенле жашыракъ кёрюнедиле: жюрюшлери, олтургъанлары окъуна башхады. Спортдан узакъда тургъанла уа теркирек къарт бола болурла, баям?

-Энишге бошланнган инбашла бла кёкюрекни тута билмеу 25-жыллыкъланы окъуна абадан кёргюзтеди. Муккурлукъ (сутулость) - ол аурууду. Андан жаланда аркъа сюекге угъай, кёкюрекдеги ич органлагъа да заран тюшеди. Анга тынгылы къаратыргъа керекди эмда энчи сайланнган багъыу физкультура тийишлиди.

Муккурлугъугъуз женгил халда эсе уа, кесигиз да тапландыраллыкъсыз халны. Аркъагъызны сингирлерине эс буругъуз. Стол артында неда машинада олтургъан кезиуюгюзде бу женгил упражненияланы кюннге алты-жети кере тамамлагъыз: терен солугъаныгъызда: инбашларыгъызны болалгъаныгъызча артха этигиз, иги бюгюлюп, аркъа жиклени кючлеп, кёкюрегигизни алгъа чыгъарыгъыз, солууну чыгъаргъаныгъызда: инбашларыгъызны тап этигиз, энди уа инбашларыгъызны къарыуугъуздан келгенича алгъа этигиз, сыртыгъызны да иги бюгюп, алгъа ийилигиз. Алай юч-тёрт кере этигиз.

Ариулукъ кюнден-кюннге къуралгъан затды. Аны эсде тутугъуз. Жашаугъа къууана билгенлени нюрлери, ышаргъанлары – кёзюнгю алалмагъан ариулукъду. Насыплыла болургъа итинейик.