Къаймакъ болушурукъ тюйюлдю

Биринчи себеп болууну юсюнден жети халкъ амал

Медицинагъа болушлукъ бериуню халкъ билген амалларыны терс бла тюз болгъанларын специалист Кюйгенланы Аминат айтады.  

1. Бек кючлю кюйдюрюуледе, ол санда кюнден, терини юсюне къалын къаймакъ неда жау жакъсагъыз тамамды .

Кюйгенланы Аминат: Ол алай тюйюлдю. Заран тюшген жерлеге къаймакъ неда жау жагъыу жарагъа инфекция кийирирге боллукъду. Быллай кезиуледе тюзю - сууукъ салыу эмда травмпунктха неда больницагъа барыу.

2. Бийик температурада жууургъаннга чёргелирге эмда бек терлерге керекди.

Кюйгенланы Аминат: Энтта да керти тюйюлдю. Уллу иссиликде жууургъаннга чёргелсенг, ол бютюнда ёрге кётюрюллюкдю. Аны себепли сууутургъа сан кючню амалларын хайырландырса игиди. Сёз ючюн, салкъын суу бла мылы этилген жан жаулукъ бла сюртюуле.

3. Къан агъыуда ит тил чапыракъ аламат болушады.

Кюйгенланы Аминат: Таурух. Быллай кезиуде ким да билген бармакъ хайырлыды: аны бла кесилген жерни неда жараны къысыгъыз. Бир ненча минутдан къан тохтарыкъды. Баш болум - къолларыгъызны жууаргъа унутмагъыз.

4. Бурундан къан келгенде бетигизни кётюрюрге керекди, башны артына салып.

Кюйгенланы Аминат: Кертисин айтсакъ, буруннга бир сууукъ зат къысаргъа эмда бурун тешиклеге водородну перекиси бла жибитилген тампонланы салыргъа тийишлиди. Къан келиу тохтамаса, биягъы больницагъа чабыгъыз.

5. Къан кючлю тёгюлгенде терк окъуна жгут къысаргъа керекди, къалай этилгенине да къарамай.

Кюйгенланы Аминат: Ол а бек къоркъуулу жангылычды. Жгутну салыу тамырланы эмда нерваланы травма бузукълагъа келтиреди. Ахырында тканьланы ишемиясы, аны къой, гангрена окъуна чыгъаргъа боллукъду.

Медикле жгутну, бир да болмаса, къан уллу тамырдан келсе къысадыла. Башха кезиуледе басхан байлам саладыла неда бармакъ бла тыядыла къан агъыуну.

6. Къан келгенинде байлау бек жибисе, аны олсагъат кетерирге керекди .

Кюйгенланы Аминат:  Угъай .Бу болумда байлау эскини башына салынады.

7. Жолда авария болгъан заманда ачыгъанланы къоркъуусуз жерге кёчюрюрге керекди.

Кюйгенланы Аминат: Бек алгъа кесигизни къоркъуусузлугъугъузну къайгъысын кёрюрге тийишлиди. ДТП болгъан жерни бегитирге, авария белгилени салыргъа, жаннган затла сизни жашауугъузгъа хата келтирмезлигине тюшюнюу. Ачыгъанны, бир да болмаса, боюннга бла башха бек сакъ болуп кёчюрюрге. Не ючюн? Аны аркъа сюегине заран салыныргъа боллукъду. Аллай бузукълукъда аз къымылдау окъуна сакъатлыкъгъа неда ёлюмге келтирирге къоркъуу барды.