Къызчыкъ зауукълу солуп, даражалы дипломгъа да тийишли болгъанды

«Моя провинция» журналист фестивальгъа къатышып, Нальчикге бла Къабарты-Малкъаргъа ыразылыгъын билдиргенледен бири Богородск шахарны телеканалында ишлеген Анна Сычёвады. Биргесине жолоучулукъгъа ол къызчыгъы Евангелинаны  да алгъан эди.  

Евангелина анасы бла бирге Минги тауну тийресинде, Чирик кёлде да болгъанды. Анна Сычёваны фестивальны номинацияларына кёре алдыргъан видеоларыны жигити да ол болгъанды. Алада къонакъ къызчыкъ Европаны бек бийик тау тёппесини этегинде болгъаныны, канатка бла ёрге кётюрюлгенлерини юсюнден да тынгылы хапар айтады.

«Мени быйылгъы школ каникулларым былай сейир ётерикдиле деп турмай эдим. Анама болмагъанча ыразыма биргесине бу жолоучулукъгъа алгъанына. Быллай сейир жерде болу кимни да муратыды. Сёз ючюн, Чирик кёл саулай Шимал Кавказда угъай да, Европада да бек терен карстовый кёлге саналады. Аны юсюнден бу жерде жашагъанладан кёп таурухла да эшитгенме. Ол бомагъанча тазады. Экскурсияны бардыргъан Лариса Смирнова айтханнга кёре, мында жуууннган адамны хазна кёрмезсе, нек дегенде кёл бек сууукъду. Алай дайверлени уа ол тыймайды. Ала бери келип, тинтиуле бардырыргъа бек сюедиле.

Ызы бла бизни Минги тауну тийресине элтген эдиле. Анда мен дунияда бек бийикде орналгъан музейде да болгъанма. Анда манга Уллу Ата журт урушну кезиуюнде совет аскерчиле Элбрусну къалай къоруулагъанларыны юсюнден хапар айтхандыла.

Чегем чучхурлада болгъаныбызда, кюнню халы артыкъ аламат тюйюл эди. Алай ол шарт мени аз да жарсытмагъанды. Андан ары бизни жолубуз Эл-Тюбюне эди. Анда орналгъан кешенеле мени неден да бек сейирсиндиргендиле. Мында бизни татыулу хычинле эм лагман бла сыйлагъан эдиле. Дагъыда ол жерледе жашагъан жашчыкъла мен таныгъанлагъа аз да ушамагъанларын эслегенме. Аланы къарамлары окъуна таукел халлиле болгъанларыны юсюнден айта эдиле.

Багъалы ата-анала! Сабийлеригизни да алып келип, мында солургъа чакъырама сизни!»

Къызчыкъ сынамлы журналистледен артха къалмай ишлегени бла кёплени сейир окъуна этдирген эди. Алай бла, Анна бла Евангелина жарашдыргъан репортаж фестивальны 2-чи даражалы дипломуна тийишли болгъанды.