Жюрек бла къан тамырланы багъыугъа ахшы себеплик

Кёп болмай,  «Саулукъ сакълау» миллет проектге кёре, Нальчикде  Республикалы  клиника  больницада (РКБ)  жюрекни бла къан тамырланы тинтирге болушхан жангы медицина  оборудование  алгъандыла.  Аны юсюнден бизге КъМР-ни Саулукъ сакълау министерствосундан билдиргендиле.

«Жюрек эм къан тамырла бла байламлы аурууладан къоруулау» регион эм «Саулукъ сакълау» миллет  проектлеге кёре, РКБ-гъа  компьютер эм  магнит-резонанс томографла алыннгандыла.  Магнит-резонанс томографны багъасы   77,7 миллион сомгъа жетеди. Аны хайыры бла мыйыларында  къан иги жюрюмей къыйналгъанлагъа диагностика бардырыргъа  жарайды.  Бу жаны бла ол эм къыйматлы оборудованияладан бирине  саналады.   Бюгюнлюкде  аны бла  къайсы  диагнозну да    тюз салыргъа эм гитче патологияланы башлана тургъан кезиулеринде ангыларгъа  онг барды. 

Компьютер томографну багъасы уа 74,5 миллион сомгъа жетеди.  Ол энчи программасыны  хайыры бла  къан тамырланы бла жюрекни  халлерин ачыкъларгъа болушады. Бюгюнлюкде республикада  аллай КТ аппаратла жаланда экиси бардыла.