Жангылыкъла

Бу кюнледе Ставрополь шахарда «Агроуниверсал-2019» деген тёрели агропромышленность кёрмюч эмда «АПК-да илму-техника прогрессни эм магъаналы проблемалары» ат бла халкъла аралы илму-практика конференция бардырылгъандыла. Аланы ишине Къабарты-Малкъар къырал аграр университетни механизация эмда предприятияланы энергия бла жалчытыу факультетини келечилери да къатышхандыла, деп билдиргендиле вуздан.

Нальчик шахар округну жер-жерли администрациясы «Ара» районда планировканы проектин жамауат сюзюуге чыгъаргъанды. Аны бла байламлы жыйылыу бу кюнледе болгъанды, деп билдиргендиле мэрияны пресс-службасындан.

Бу проект сагъынылгъан районда Шогенцуков, Толстой, Ногмов эмда Кабардинская орамла бла чекленеди. Аны ахыргъы планировкасы 1988 жылда этилген эди. Ол кезиуде бу тийреде кёп фатарлы юйле ишлерге мурат болгъанды. Алай андан бери аслам заман ётгени себепли проектни жангыртыргъа тюшгенди. 

РФ-ни Къурулуш  министерствосу «Шахарда болумну игилендириу» деген программа жашауда къалай бардырылгъанын билир ючюн 35 регионда тинтиуле бардыргъанды. Ызы бла къуралгъан рейтингде Къабарты-Малкъар Республика отузунчу жерни алгъанды.

Алгъаракълада республикада жашланы бла къызланы араларында ишчи усталыкъланы юсю бла чемпионат бардырылгъанды. Анга кийимле тигиучюле, агъач устала, къурулушчула, чач къыркъыучула, темирчиле, женгил машиналагъа, эл мюлк техникагъа ремонт этиучюле, аш хазырлаучула, башха усталыкъланы сайлагъанла да къатышхандыла.

Быйыл Къабарты-Малкъарда эллени ичлери бла баргъан автомобиль жолланы  жыйырма беш километр чакълы бирине чыракълары бла чыпынла орнатыллыкъдыла. Ол былтырдан юч кереге кёпдю, дегенди республиканы Жол мюлк управлениясыны таматасы Рафаэль Акопян.

КъМР-ни Культура министерствосу, Суратлау искусстволаны А. Ткаченко атлы музейи  Малкъар халкъны жангырыууну кюнюне аталгъан «Тауланы макъамы» деген кёрмючге чакъырадыла.

РФ-ни Пенсия фондуну республикада бёлюмю сакъат адамла, фондха келип, жумушларын тамамлаялырча онгла къураугъа энчи магъана береди. Бу ишни «жол картагъа» таянып бардырады. Ол а къыяулары болгъан адамла мекямлагъа, транспортха киргенде, связь бла хайырланнганда, башха жумушларын этгенде тюбеген чурумланы табар эм аланы кетерир муратда жарашдырылгъанды.

РФ-ни Эл мюлк министерствосу бла Къабарты-Малкъарны  Правительствосу  «Халкъла аралы кооперация эм экспорт»  миллет проектни чеклеринде  келишим бегитгендиле. Анга  кёре республикада чыгъарылгъан  эл мюлк продукцияны экспортха жибериуге себепликге 110 миллион сом бёлюнюрюкдю,- деп билдиргенди  КъМР-ни эл мюлк министерствосунда финансла, экономика эм къырал болушлукъ берген управленияны  таматасы Ирина Кулакова.

Къабарты-Малкъарда «Ростелеком» компания былтыр къырал эм коммерциялы 330 объектни связьны жангы тюрлюсюне – оптикалы волокногъа кёчюргенди. Анга деп компания 75 километр чакълы  бирге жангы ыз  тартханды.

Кёп болмай Элбрус районда Къабарты-Малкъар къырал университетни билим бериу-илму базасында «Республиканское движение «Наставник» деген форум бардырылгъанды. Анга жюзге жууукъ адам къатышханды. Аны КъМКъУ-ну студентлерини бла аспирантларыны профсоюзу,  Насийхатчыланы биригиулери  регионла аралы жамауат организация эм «Росмолодёжь» къырал агентство  КъМР-ни эллеринде  16-23 жыллары болгъанланы араларында законла чыгъарыучу эм толтуруучу власть органлагъа кадрла хазырлар умутда къурагъандыла.