Жангылыкъла

   Нальчик шахарны жер-жерли администрациясындан билдиргенлерине кёре, быйылдан башлап 2024 жылгъа дери бардырыллыкъ «Шёндюгю шахар тийре» деген программаны юсю бла къыралны бюджетинден муниципалитетге аслам  ахча берилгенди. 

    Къысха заманны ичинде Россейде тийишли органла «ВК», Viber, WhatsApp  сетьледе пабликлени бла чатланы эм бир къауум  телеграмм-каналланы таматаларыны тизмесин къурарыкъдыла. Аны юсюнден программист эм миллиардер Павел Дуровну «Цифровое сопротивление» деген къымылдауу билдиреди. 

   Белгилисича, Жангы жылны байрамларында Минги тауну этеклеринде солугъанланы саны быйыл 54 мингнге жетгенди. Ол санда канат жолланы 40 мингден артыгъы хайырланнгандыла. Курортну инфраструктурасы чырмаусуз ишлеп турур ючюн энергетикле да къолдан келгенни аямагъандыла. «Каббалкэнерго» компаниядан билдиргенлерича, аны специалистлери энергообъектлеге,  кече-кюн демей, дайым кёз-къулакъ болгъанлай тургъандыла. Керек болса уа, ремонт бригадала къалайгъа да мычымай жетерге хазыр эдиле.

  Нальчикде аш-азыкъ хазырлау эмда адамланы жумушларын жалчытыу учрежденияланы жангы жылны байрамына эм ариу жасалгъанланы арасында конкурс бардырылгъаныны юсюнден алгъаракълада билдирген эдик.

   ВТБ "Жилямукъсуз дуния"  жандауурлукъ программагъа кёре, Республикалы сабий клиника больницаны хирургия бёлюмюне 1 500 000 сом  тургъан диагностика оборудование алып бергенди.

25-28 январьда Пятигорскда «Россейни лидерлери» деген конкурсну регион бёлюмю бардырыллыкъды. Анга Шимал-Кавказ федерал округну республикаларындан  заочный эришиуледе жетишимле болдургъан 193 адам чакъырыллыкъды, ол санда КъМР-ден 16-сы.  

Бу кюнледе Элбрусда къар юзюлюп тюшюуге къажау кюрешгенле Чегетде, Терс-Къолда эм Ишхилдиде битеу да онеки  участокда  топ бла 32 кере атдырып,алада жыйылгъан къарны эндиргендиле.

  Бу кюнледе билдиргенибизча, кёплени былтыр декабрьде газ ючюн тёлегенлери «Газпром межрегионгаз Нальчик» компаниягъа жетмей къалгъан эди. Аны алайлыгъы быллай тёлеулени жыйыу бла кюрешген «Интегра Софт» организация бла этилген келишим кючюн тас этгени бла байламлыды. Ызы бла, ары барып, заявление жазып, ахчагъызны артха алыгъыз деген хапарла да жюрюп башлагъандыла халкъда.

Нальчикде  социал болушлукъ бериу жаны бла ара жангыз жашагъан къарт-къарыусузлагъа  бютюн  сакъды, алагъа дайым  кёз-къулакъ болуп турады.   Анда ишлегенлени себепликлери  эмда жандауурлукъ этгенлени  болушлукълары бла аллайлагъа шахарда жыл сайын  ашарыкъ затла юлешинедиле. Бу жол да алай болгъанды:  жетмиш адамгъа  жыйырмашар килограмм картоф, бешишер килограмм сохан, биришер литр чеплеу жау эмда  татлы суула берилгендиле.

  23 январьда Прохладный шахардан гинжи театр эм Нальчик шахардан «Шаудан» жыр ансамбль КъМР- ни Саулукъ сакълау министерствосуну Сабий юйюнде жандауурлукъ акция бардыргъандыла.