Жамауат

Озгъан шабат кюн Нальчикде  "Ностальжи" кафеге бир да болмагъанча кёп адам жыйылгъан эди. Келгенлени хар бирине да босагъадан окъуна жарыкъ тюбегендиле, сабийлерине уа  бёркчюкле, илляула да юлешгендиле. Андан сора    татлы ашарыкъладан толгъан столлагъа  чакъыргъандыла. Артыкъ уллу болмагъан залда ол кюн   жетмишге жууукъ  адам олтура эди. "Кураж" къауум оюнлары, жырлары бла да  къонакъланы  эрикдирмей тургъанды.
 

Жаз башыны биринчи кюнлеринде  Зольск районну  чыгъармачы коллективлери   Къашхатауда къонакъда болгъандыла эмда маданият юйде   уллу концерт  кёргюзтгендиле. Ол байрам  муниципалитетлени араларында бирге  ишлеу жаны бла  келишимге къол салыннганлы бир жыл толгъанына жораланнганды.

Къабарты-Малкъар къырал аграр  университетде  жылны аллында  вузну айырмалы студентин сайлау  ахшы тёреге айланнганды. Озгъан орта кюн да аллай конкурс болгъанды.  

Нальчик шахарда психоневрология интернатда бусагъатда жюз бла он адам турады. Ала барысы да кеслерине къараялмагъанладыла.

Электрон  промышленностьну эмда РФ-ни бирикдирилген электрический системасыны сыйлы къуллукъчусу, КъМР-ни сыйлы энергетиги   Ахметланы Нохну жашы Азиратали урунуу жолун заводда слесарьны шекертинден башлап, къоруулау промышленностьну  предприятиясыны башчысына дери кётюрюлгенди. Къыралыбызгъа къыйын 90-чы жыллада халкъ депутат болуп  да тургъанды.

Белгилисича, генле кеслерин адамланы бир ненча тёлюлеринде  билдиргенлей турадыла. Мёчюланы Хызыр, анасы айтып, былай биледи: ата жанындан  экиге айланнган аппасы Мёчюланы Кязим, малкъар  поэзияны  мурдорун салгъан назмучу, белгили  халкъ  багъыучу, ана жанындан ыннасыны анасы  Арюбат, ыннасы Даухат, Нафисат да белгили  кырдыкчыла-багъыучула болгъандыла . Хызыр а аладан да ары баргъанды- ахшы врач болгъанды.

Мен атамы туугъан эли Бызынгыда терк-терк болама. Ата-бабаларымы журту болгъаны ючюнмюдю, башха сылтау бламы, кесим да ангыламайма, алай жюрегим бу тау ауузгъа хар заманда тартыучуду, анда жашагъанланы энчи кёреме. Мында жылны къайсы кезиуюнде да бек ариуду. Жайда уа гюлле алай чагъадыла, таулу кийизни жайгъанча, бу тийрени бютюн айбат этедиле. Эки бийик тауну арасында орналгъан жаны бла уа кёпню кёрген Черек сууу шорхулдап баргъан элден миллет  ёхтемленирча кёп адам чыкъгъанды.
 

Черек районда Жаш айырыучуну кюню  бардырылады. Жер-жерли айырыу комиссия  район администрация, билим бериу эмда жаш тёлю политика  управление бла бирге  Къашхатауда, Зарагижде, Бабугентде, Огъары Малкъарда битеулю билим берген учрежденияланы окъуучулары бла тюбешиуле бардырады. Бу ишни  мураты – жаш адамланы эслерин айырыулагъа эмда саулай да айырыу правогъа бурууду, ала  къырал властьны органларын бла жер-жерли самоуправленияны органларын къурау бла байламлы бу ишге тири къатышырча этиудю.

«Наше будущее» фонд «Социал предприниматель – 2019» деген конкурсха къатышыргъа сюйгенлеге заявкала берирге  чакъырады. Ахча болушлукъну жайда алыргъа излегенле аны  биринчи мартха дери  тапдырыргъа керекдиле. Болсада аны жылны ичинде берирге да жарайды, алай хорлагъанла уа  жайда бла кюз артында белгили боладыла. Айтылгъан кезиуге бералмагъанланы заявкаларына жылны экинчи жарымында къараллыкъды.  

РФ-ни Пенсия фондуну КъМР-де бёлюмюню пресс-службасындан билдиргенлерине кёре, быйыл кийирилген тюрлениулени эсге алып, элде жашагъанланы пенсиялары къаллай бир боллугъу тергелип бошалгъанды. Аны эсеплерине кёре, ишлемеген 2800-ден аслам адамны ахчаларына къошулгъанды.

Пенсияла жангыдан пенсиячыланы бёлюмде болгъан документлерине кёре тергелгенди, къошулгъан ахчаны ёлчеми 1333 сомгъа жетгенди. Бу иш бусагъатда да бардырылады.