Экономика жаны бла билимлерин ачыкълагъандыла

Къабарты-Малкъар къырал университетни башха-башха бёлюмлеринде билим алгъан жашладан бла къызладан мингден асламысы кеслерини экономика жаны бла  окъуулулукъларын «Битеуроссей экономикалы диктантха» къатышып ачыкълагъандыла. КъМКъУ-ну майданында проектни кураторлары уа право, экономика эмда финансла институтну экономика эмда эсеплеу-аналитика кафедрасыны преподавательлери Лорина Асланова бла Бэлла Кармова болгъандыла. Акцияны мураты уа жаш тёлюню экономика илмугъа сейирлерин къозгъауду.

Диктантны тестлери экиге бёлюнюп берилгендиле. Сёз ючюн, битеулю билим берген мектеплени тогъузунчу-онбиринчи классларында бла усталыкълагъа тюшюндюрген колледжледе окъугъанлагъа эмда бийик окъуу юйлени студентлерине, бирси профессионал эмда социал къауумлагъа («студентле эмда бирсиле» категория).

Ишле уа тёреге тийишлиликде дисциплинала аралы кёз къарам бла къуралгъандыла. Башхача айтханда уа, ала жаланда экономика бла байламлы болуп къалмай, обществознание, орус литература, тарых эмда правоведение дерследен да билимлиликни излегендиле.

«Битеуроссей экономикалы диктант» атлы акциягъа быйыл, къыралны битеу регионларындан сора да, Беларусь, Монголия, Армения, Узбекистан, Къазахстан, Таджикистан, Тюрк, Туркменистан, Сирия, Къытай къошулгъандыла. Аны Россейни Эркин экономика обществосу бла Экономистлени халкъла аралы союзу къурагъандыла. Партнёрлары уа Юрий Лужковну фонду, Россейни тарых обществосу, белгили  вузлары, РФ-ни субъектлерини администрациялары, РАН-ны институтлары болгъандыла.

Диктантны эсеплери Битеуроссей экономикалы жыйылыуда белгиленирикдиле. Ол а экономистлени усталыкъ байрамларына аталып бардырыллыкъды.

Кураторла билдиргеннге кёре уа, КъМКъУ-ну студентлери ишни жетишимли жазгъандыла. «Экономика» ызны магистранты Темуккуланы Харун а эм бийик кёрюмдюню болдуруп, сынауну жюз баллгъа жазгъанды.