Окъутханларын, ёсдюргенлерин да къууандыргъан

Жыл сайын да жашларыбыз бла къызларыбыз мектеплени жетишимли бошап, жюреклери излеген усталыкълагъа юйренир ючюн окъуугъа кирселе, аллай жаш тёлюбюзню барлыгъына барыбыз да къууанабыз. Быйыл Чегем районну Хушто-Сырт элини Гыжгыланы Зейтун атлы битеулю билим берген школун а тёртеулен тауусхандыла. Аланы араларында окъууда жетишимлери эмда ариу къылыгъы ючюн алтын майдалгъа уа Шахмырзаланы Арсен тийишли болгъанды.

Ол гитчелигинден бери хар нени да билирге сюйгени, кесин ариу жюрютгени бла да айырмалы болгъанлай келгенди. Мектепде дерслеринде иги окъугъаны, жетишимли болгъанындан сора да, аны жамауат ишине да тири къатышханлай тургъанды. Тюрлю-тюрлю эришиуледе, олимпиадалада, конкурслада алчы жерлени да алгъанды.

Сёз ючюн, 2021 жылда ана тилден бла адабиятдан «Тилибизни билгичлери» атлы район даражалы эришиуде биринчи жерни алып, Сыйлы грамотагъа, ахча саугъагъа да тийишли болгъан эди. Хунерли жашны жерибизни жер-суу атларын тинтип жазгъан иши да магъаналы эмда сейир болгъанды. Аны физикагъа, сурат ишлеуге, техникагъа да сюймеклигин белгилерчады.

Былтыр «Мени туугъан жерими ызлары» деген конкурсда Арсен бизни ата-бабаларыбыз буруннгу заманда таулу юйлени къалай ишлегенлерини юсюнден жазып эмда къолу бла ишлеп кёргюзтген проекти бла республикабызны атын Москвада да айтдыргъанды эмда энчи диплом бла да саугъаланнганды.

Дагъыда ол Уллу Хорламны 72-жыллыгъына аталып бардырылгъан «Уруш мени юйюрюмю тарыхында» деген район даражалы конкурсха илму-тинтиу иш хазырлап, анда биринчи жерни алгъанды.

«Жигитликни юсюнден сени сёзюнг» атлы адабият-чыгъармачылыкъ жаны бла эришиуню «Юйюр альбомгъа къарай» деген бёлюмюнде да биринчи оруннга чыкъгъанды. 2021 жылда Чегем районда «Жылны окъуучусу» деген даражалы ат да анга берилгенди. «Палитра ремёсел» Битеуроссей конкурсха уа ол тирмен да ишлеген эди.

Арсен къолдан кёп затха хунери болгъан жашды. Сварка этеди, суу, ток да тартады, плитка салады, обойланы жабышдырады. Юйде малгъа къарайды, алагъа орун да ишлегенди, бичен да чалады, башхача айтханда уа, бош турмайды. Билмеген, ангыламагъан затын атасы Зуфардан сорады. Ол а мектепде технологиядан окъутады.

Анасы Аслижан да математикадан устазды. Ол а: «Машинаны берип къойсанг, бек сюйюп чачарыкъды», - деп кюледи. Ол бу ишни уллу сейири, итиниулюгю бла этгенин черте, артда машинаны тауушун эшитсе, андан уллу зауукълукъ тапханын да айтады.

Аны техникагъа, машинаны жыяргъа, жашауун инженер усталыкъ бла байламлы этерге сюймеклиги уа Арсенни Къабарты-Малкъарны автомобиль-жол колледжини машиналаны двигательлерине бла электрон системаларына ремонт этерге юйретген бёлюмюне окъургъа келтиргенди. Ол бегирек къолу бла ишлерге излегени ючюн эм алгъа усталыгъыны эбине колледжде тюшюнюр акъылдады. Артда бийик билим алыр, ызы бла уа машиналагъа ремонт этиу жаны бла иш ачар мураты да барды.

Айырмалы къол хунери болгъан жаш усталыкъ сайлауунда кесини жюрек излемине кёре тохташханды. Аны себепли биз да келир заманда ол кесини атын иги бла айтдырыр, жетишимли да болур деген умутдабыз. Аны ангылаууна бюгюнлюкде окъуна ышана эселе, ол билимин ёсдюрсе, жамауатха бютюнда бек жарарыгъы да баямды.