Отлукъну багъасы тохташыргъа ушайды

Россейни Правительствосу къыралны ичинде отлукъну багъасы андан ары кётюрюлюп бармазча амал тапханды. Налог кодексге тюрлениуле кийирип, биринчи октябрьден башлап, отлукъ демпфер деген затны 0,5 угъай, 1 коэффициентин хайырланып тебирерикдиле. Аны себепли нефтьни жарашдырыучу компаниялагъа уллуракъ компенсация тёленирикди. Аны бла ала отлукъну багъасын кётюрмей къойгъанлары ючюн къоранчларын къайтараллыкъдыла.

Дагъыда ол компаниялагъа бензин эмда дизель отлукъланы биржада сатыу жаны бла излемле кючлендирилгендиле. Иш алай болгъаны себепли къыралны ичинде рынок отлукъдан къытлыкъ сынарыкъ тюйюлдю, биржада оптовый багъаланы ёсюую да тыйыллыкъды.

Отлукъну биржада сатыу аны рынокда жюрюген багъалары бла алыргъа онг береди. Аны себепли уллу компанияла багъаланы кеслери сюйгенлерича тутарла деген къоркъуу да азаяды.

Энтта да бир амал багъаланы тыярча: нефтьден этилген продукцияны къыралдан тышына ташыугъа салыннган чеклениу кетерилгени бла отлукъну ары мардасыз жибериу болмаз ючюн, саудюгерчилеге пошлина салынырыкъды: бир тоннагъа – 50 минг сом.

Правительство дагъыда тенгиз портлагъа быргъыла бла дизель отлукъну экспортха жибергенлеге чеклениулени кетергенди. Бу амалны аллай продукцияларыны эм азындан экиден бирин ич рынокда сатханла хайырланыргъа боллукъдула.