Багъасы неден къуралады?

Машинасы болгъан хар кимни да ОСАГО полиси да болургъа керекди. Водитель авариялагъа тюшмей жюрюте эсе автомашинасын, страхованияны этиу да аз учузуракъ келирге боллукъду. Андан сора да, аны азайтхан энчи коэффициент барды – бонус-малус (КБМ). Ол адам авариялагъа тюшерге ёч болгъанын ачыкълагъан кёрюмдюдю, дейдиле Объясняем.рф порталда басмаланнган ангылатыу материалда.

Бирле биле да болмазла, алай КБМ машинагъа угъай, водительге деп жарашдырылады. Сиз мотоциклни, автомашинаны, башха техниканы алышындыргъанлыкъгъа, бу кёрюмдю тюрленирик тюйюлдю.

Бонус-малусну къаллай тюрлюлери болуучудула?

Аны битеу да онбеш тюрлюсю барды: 0,1-ден башланып, 13-ге жетеди. Ол не къадар аз болса, полисни багъасы ол къадар багъа болады. Сёз ючюн, руль артына энди олтургъан инсанлагъа ючюнчю классны бередиле. Алагъа КБМ 1,17 болады. Авариялагъа тюшерге ёч болгъан водительлени коэффициентлери - 3,92, он жылны ичинде бир ДТП-гъа тюшмегенлени уа – 0,46 (13 класс). Алагъа кёре полисни эм аз эмда уллу багъаларыны башхалыгъы 8,5 кереге жетерге боллукъду.

КБМ неллай бир заманны турады?

Аны бир жылгъа бир кере жарашдырадыла. Кеси да 1 апрельден башлап  31 мартха дери хайырланылады. Ызы бла страховой компания жангыдан тергейди.

• Онючюнчю классы болгъан водительни коэффициенти тюрленмейди;
• Бир жылны авариясыз жюрюгени ючюн бир пункт къошадыла – сёз ючюн, сегизинчиден тогъузунчу классха кёчюредиле;
• Эм осал классы (М) болгъанла, ол кезиуде жангы авариягъа тюшселе, энтта да ол классда къаладыла;
• Тюз бир ДТП-гъа тюшгенлей, класс олсагъат окъуна талай пунктха азаяды.

Полисге бир ненча водитель жазылгъан эсе, КБМ неллай бир боллукъду?

ОСАГО-ну багъасы ол водительлени санында эм осал кёрюмдюлери болгъаннга кёре тергелликди.

 КБМ-ни къаллай болгъанын къайда билирге боллукъду?

Аны автостраховщиклени Россей союзуну сайтында билирге жарайды. Аны ючюн ма быланы кёргюзтюрге керекди:

• ОСАГО-ну къачан сатып алыргъа сюйгенигизни;
• Атыгъызны эмда тукъум атыгъызны, туугъан кюнюгюзню;
• Водитель удостоверенияны номерин.

Коэффициент терс эсе уа?

Полисни къайсы страховой компанияда сатып алгъан эсегиз да, ары барыгъыз. Ызы бла заявление жазыгъыз, ары дери ОСАГО-ну къайда алып туруучугъузну да кёргюзтюгюз. Коэффициент терс болгъаны ачыкъланса, страховой полисни багъасын жангыдан тергерикдиле, сагъынылгъан Союзгъа жазып, КБМ анда тюз болурча да этерикдиле.