Устазланы административ ауурлукъдан бош этиу жаны бла башламчылыкъны хазырлайдыла

Жангы окъуу жылны аллында «Единая Россияда» педагогладан отчётланы асыры кёп излеуню проблемасындан къутулуу жаны бла башламчылыкъны хазырларыкъдыла. Аны юсюнден кеслерини оюмларын хар сюйген адам партияны регион бёлюмлерине 28 августха дери сайтланы юсю бла жиберирге боллукъдула. Тёртюнчю сентябрьде уа аланы битеу тийишли ведомстволаны, экспертлени, ата-аналаны къатышыулары бла  «Адамны ырахатлыгъы» деген федерал дискуссияла майданда сюзерге белгиленеди.

Аны юсюнден партияны Генсоветини секретарыны биринчи орунбасары Ольга Баталина билдиргенди.

-«Устазла арасында бюрократиягъа къажау башламчылыкъ» - ол халкъ проектди. Аны къуру педагогла угъай, ата-анала, окъуучула да кюсейдиле. Жарашдырыугъа бла,  ала бла ишлеуге устазла къатышырыкъ документлени тизмесин къурашдырыргъа эмда къалгъан актла ючюн да кимле жууаплы болгъанларын белгилерге керекди. Партияны регионлада сюзюуле къурагъаныны  хайырындан  билим бериуде ишлегенледен отчётла жарашдырыу, планла къурау, тюрлю-тюрлю информация сурамлагъа жууапла бериу эмда башха ауурлукъну азайтыуну юсюнден оюмла жыйышдырыллыкъдыла»,-деп билдиргенди Баталина.

Ол «Единая Россия» жангы школланы, спорт майданланы къурулушларына,  мектепледе сабийлеге къоркъуусуз эмда тап болумла къураугъа уллу эс бургъанын да эсгертгенди. «Алай бек башы – школда сабийле бла ишлеудю. Устазладан аланы ишлери бла байламлы болмагъан жумушланы, ол санда къагъыт ишлени да, кетерирге керекди. Ала анга билим бериуге кёбюрек эс бурургъа,  кесини да усталыгъын кётюрюрге чырмау этедиле»,-деп оюмлайды Баталина.

Ол айтханнга кёре, депутатла инсанла бла тюбешиуледе устазлагъа къагъытланы асыры кёп жаздырадыла, отчётланы аслам излейдиле, ол а окъуу ишге чырмау этеди деп, кёп тарыгъыула эшитедиле. «Педагогланы 80 процентинден асламы школда ишни къыйынлыгъын,  отчётланы саны эмда бюрократия ауурлукъ бла байламлы этедиле. Анга РАНХиГС-ни Прикладной экономика тинтиуле институтуну тинтиулерини эсеплери да кёргюзтедиле. Федерал властьланы уа устазлагъа жетген ауурлукъну азайтыргъа къолларындан келмейди – ол регион эмда муниципал органланы оноуларындады»,-деп белгилегенди партияны Генсоветини секретарыны биринчи орунбасары.