ИГИНИ СЫРЫ – БАЛАСЫНДА

Къабарты-Малкъарны сыйлы устазы, РСФСР-ни халкъны жарыкъландырыуда отличниги Баразбийланы Ануарны къызы Эльмира республиканы устазларыны араларында атын иги бла айтдыргъан, билимли адамларыбыздан бириди. Ол Быллым элде школда ишлегенли къыркъ жылдан атлагъанды.

Эльмира Тырныауузда туугъанды. Быллым элни школун 1976 жылда алтын майдал бла тауусханды. Ызы бла Къабарты-Малкъар къырал университетни физика-математика факультетини математика бёлюмюне киргенди. Аны да 1981 жылда айырмалы бошап, Быллымгъа къайтып, бюгюн да анда ишлеп турады.

Хар не да юйюрде башланады. Эльмираны атасы Баразбийланы Таусону жашы Аныуар Огъары Чегемде туууп, Быллымда жашагъанды. Ол эл сый берген адам эди. Ол жыллада мюлкледе бек керекли усталыкъгъа окъугъанды – механик болуп, элине жарагъанды, Тырныауузну бир-бир биригиулеринде махтаулу ишлеп тургъанды.

Эльмираны анасын – Афашокъаланы Бийбертни къызы Нафийсатны аты Къабарты-Малкъарда иги да белгилиди. Ол не заманда да ыспас бла айтылады. Ол  анга урунууда этген жетишимлери бла тийишли болгъанды. Дунияда уруннган адамны намысына жетген не барды?

Уллу Ата журт уруш башланнган заманда аны юйюрю Быллымда жашагъанды. Белгилисича, Чегем ауузундан келип, Быллым элни къурагъан тукъумладан бири эдиле Афашокъалары. Къочхарташ, Быллым Чегем районну къурамында болуп, таула бла салыннган жолла бла ётгендиле бир бирге жууукъ-ахлула.

Атасы Бийберт, аны тёрт къарындашы да бирча кетгендиле урушха. Жарсыугъа, ала андан къайтырча болмагъандыла. Хорламгъа юлюш къошхан аскерчини къызын а, аллай жигитлени къарындашларындан туугъан Нафийсатны, кёчгюнчюлюк жолла Къазастаннга элтип, онюч жылны ол анда Белоусовка атлы посёлокда жашагъанды.  Къыз  да, башха таулу тиширыулача, жаз, жай узуну «Къызыл Аскер» колхозну чюгюндюр бахчаларында уруннгандыла, къышда уа фермада малчылагъа болушлукъ этгенди. Ата журтха къайтхандан сора уа, ол жашауун Баразбийланы Таусону жашы Ануар бла байлагъанды.

Нафийсат кёп жылланы «Быллым» совхозну сабанчы бригадасына таматалыкъ этгенди. Ахшы уруннганы ючюн Ленинни орденине бла  «Урунууну ветераны» деген башха   майдаллагъа, да тийишли болгъанды. Ол бир ненча кере Москвагъа Эл мюлкню битеусоюз кёрмючюне баргъанды. Анда кёргенин Быллымда ёсдюрюрге талпыгъанды. Бир ненча кере шахар эм посёлок советлени депутатына айырылгъанды. Алгъаракълада ол сыйлы адам дуниясын алышханды.

Аны къызы Эльмира да анасыны махтауун бютюнда бийик этип жашайды. Ол эрттеден бери да школда директорну окъуу-юйретиу жаны бла орунбасарыды. Билимин ёсдюрюу жаны бла ишин бир заманда къоймагъанды. Окъуучуларыны къайда эришиуледе да хорлам алып, алчы жерлеге чыкъгъанлары, аланы бийик окъуу юйлеге тынч киргенлери да аны ишини не тюрлю бийикде баргъаныны багъасыдыла.

Ата-ананы сыры сабийге кёчгенини юлгюсюдю бюгюн Баразбийланы Эльмираны жашауу.   Жашау нёгери Ёзденланы Хасан бла ол  юч сабий ёсдюргенди. Бюгюн ала туудукъларына къууанып жашайдыла.

Быллым школда кёп жылланы директор болуп тургъан, бусагъатда уа Элбрус районну Билим бериу управлениясына таматалыкъ этген Атаккуланы Нюржан: «Эльмира Ануаровна ишин билген устазды. Иги билим береди сабийлеге. Кеси да не жаны бла да бек жууаплыды. Устазны ишинде ол бек керекли шартды. Дерсге хазырлана туруп, аны окъуучулагъа сейир этерге итинеди. Бир дерси башхасына ушамагъаны да эсленеди. Олимпиадалагъа, башха эришиуледе да къатышадыла бизни окъуучуларыбыз математикадан. Къууандырып къайтадыла, айырмалыла болуп. Эльмира Ануаровнаны адамлыкъ жанын айтханда, ол да юлгюдю кёплеге. Намыслы, сабыр сёзлю, акъыллы. Керти адамланы къолларында ёсгенди да, аланы намысларын бюгюн да бийикде тутады», – дейди.