Жангы мектепле ишленедиле

Белгилисича, арт кезиуде республикабызда жангы мектеплени неда алагъа къошакъ халдагъы мекямланы ишлеу андан ары бардырылады. Бу жаны бла Нальчикде да иш бюгюнлюкде къыстау барады.

Сёз ючюн, Вольный Ауулда онекинчи номерли школну 800 сабийге жангы мекямы, жаланда ара  шахарыбызда угъай, саулай да республикада окъуна эм ариуладан бла тынгылыладан бири боллукъду. Бу проектге тийишлиликде школну арбазында стадионла, башланнган классланы сабийлерине спорт эмда оюн майданла, олтуруп солурча жерле да болургъа керекдиле. Бюгюнлюкде мектепни фундаментин къуяргъа хазырланыу жумушла барадыла.

Дагъыда Къулийланы Къайсын атлы орамда онтёртюнчю номерли гимназиягъа 800 окъуучу сыйынырча жангы бёлюм къошуллукъду. Аны хайыры бла уа бу мектепге сабийле барысы да бир-эрттенликдеги сменнге жюрюрча онг боллукъду. Шёндю мекямгъа деп бёлюннген майдан тап халгъа келтириле, коммуникация ызла тартыла турадыла.

«Восточный» микрорайонда уа 1500 сабийге жери бла жангы школ ишлене турады. Мекям юч къатлыды, тёрт  бёлюмю боллукъду. Окъуу кабинетледен тышында да, мында актовый зал, 750 адам сыйынырча ашхана, спорт эмда жараула бардыргъан залла, китапхана, саулукъгъа къарагъан бёлюм да боллукъдула.

Дагъыда мында футбол эмда баскетбол ойнарча майданланы къураргъа да белгиленнгенди. Шёндю мекямны ичинде бардырылыргъа тийишли ишле этиле турадыла.