Малла жайлыкъда терк айныйдыла

Бу кюнледе   биригиулени  бла  энчи иелени малларыны  танг кесеги  республиканы  жайлыкъларында кечинедиле.  Лиуан Кабардов да  жаз башындан бери  ортакъгъа жер юлюш алып,  тууарларын Хаймашада тутады. 

Ол гитчеликден окъуна маллагъа тартыннганын айтады.  Аны ючюн жылдан-жылгъа аланы санын кёбейте, сынамын да ёсдюре баргъанды.   Арт беш жылда уа ийнеклери бла таналарыны  санын  жюзден асламгъа  жетдиргени себепли,  тышына къыстамай амал болмагъанды. 

Бусагъатда жайлыкълада 37 минг тууар кечинеди. Аланы арасында сютге эм этге да жарагъан  кёп къумалы барды. Ол санда  стейклеге аламат келишген, «мермер» этли   абердин-ангусла да. Арт заманда алагъа сурам ёсгенлей барды.    Андан сора да, къоншу  къошлада 83 минг ууакъ мал эм 5 минг чакълы ат кечинедиле. 

Хаймашада, Ауар сыртында эм башха  тау жайлыкълада  малла болмагъанча иги айныйдыла, танымазча  ёседиле эм соярча  эт аладыла. Анга себеплик этген шартладан бири уа  эки километр чакълы бийикде, кюнлюм бетледе танг  кесек татымлы  ханс ёсгениди. Аны ючюн къошакъ халда мирзеу неда башха витаминли аш берирге керек болмайды.  

Саулай алып айтханда, республиканы жайлыкъларыны уллулугъу 137 минг гектаргъа жетеди. Бусагъатда андан жаланда  бешден тёртюсю хайырланылады. Малчыла, узакълада, къыйын хауа болумлада къыйналмазча онгла да къуралгъандыла. Ол санда ауругъан маллагъа заманында ветеринар къарарча амал барды. Сюрюучюле элден  узакъда турургъа тюшселе да унутулуп къалмайдыла. Аланы кёллерни алырча  терк-терк жарыкъ   концертле да  ётдюрюледиле. 

Хар замандача, сууукъла жууукълашханы бла  октябрьде тууарланы эм ууакъ малланы да  тюбюне эндирип башларыкъдыла.