Бийик жетишимле болдургъандыла

Бу кюнледе энди сабийле быйыл берген Бир къырал экзаменлени эсеплери белгили бола башлагъандыла. Эсгерте кетейик, эм алгъа уа ала  химиядан, орус литературадан бла географиядан баргъандыла ЕГЭ-леге.

Алай бла энди ахшы хапар да барды. Химия дерсден юч къызчыкъ бийик жетишимле болдургъандыла. Жюз баллагъа тийишлилени санында Мисирланы Саида болгъаны да къууандыргъанды. Андан сора да, быллай жетишимлеге жетгенле Саримат Кушхова бла Лаура  Туковадыла.

Саида Нальчикни отуз экинчи школунда билим алгъанды. Ол мектепни Роснефть классына 2021 жылда жюрюп тебирегенди. Биринчи классдан бери да «бешле» алып окъугъанды. «Сигма» атлы конференциялагъа, химиядан Шимал-Кавказ даражада бардырылгъан дерс олимпиадалагъа къатышып тургъанды. Мисирланы къызчыкълары окъууну-билимни сюйген, эсли, тенглери бла терк илешип къалгъан сабийди.

Лаура уа ара шахарыбызны жыйырма жетинчи номерли школун бошагъанды. Ол орус тилден, биологиядан, химиядан, экологиядан бла экономикадан регион эмда къырал даражалы олимпиадалада хунерин да ачыкълагъанды. Юч жылны ичинде физикадан бла химиядан Шимал-Кавказ, КъМКъУ-ну ачыкъ эмда «Сириус-Антарес» олимпиадалагъа къатышып, бир ненча кере призёр болуп, хорлагъан да этгенди. Экологиядан Битеуроссей олимпиаданы республика урумуну эсеплерине тийишлиликде КъМР-ни Башчысы Казбек Коковну премиясы бла саугъаланнганды.

Саримат а экинчи номерли лицейни тауусханды (Нальчик). Химиядан Битеуроссей дистанцион олимпиаданы призёруду эмда алчысыды. «Жаш профессионалла» бешинчи регион даражалы усталыкъ эришиуню медицина ызында экинчи жерни алгъанды.

Орус тилден Битеуроссей олимпиадада шахар урумда хорлагъанды. Къабарты-черкес тилден, экологиялы диктантдан да алчы болгъанды.

Суратда: Мисирланы Саида.