Танг кесек ишчи жер кёргюзтюлгендиНальчикде онбеш майданда «Россейде ишлеу. Амалланы кезиую. Бюгюн бирге тамблабызны къурайбыз» деген ат бла ишчи жерлени битеуроссей ярмаркасы бардырылгъанды. Аладан бири Къырал концерт залда ётгенди. Кёргюзтюлген ишчи жерлени саны 1,3 мингден атлагъанды. Ярмарканы магъанасы иш бла жалчытхандан сора да, тийишли эсгертиуле берип, болушлукъ тапдырыргъады. Анга промышленность, эл мюлк, саулукъ сакълау, билим бериу, къурулуш эм башха бёлюмледе уруннган, ишчи кадрла керек болгъан 45 предприятие бла организация къатышхандыла. Аны чеклеринде иш къоллу болургъа излегенле организацияла бла толуракъ шагъырейленирге онг табадыла. Ол санда къаллай усталыкъ изленнгенин, айлыкъны, социал гарантияланы, усталыкъларын ёсдюрюрча программаланы юсюнден да биледиле. Андан тышында «Демография» миллет проектге кёре къошакъ халда усталыкъ алырча онг да кёплеге себеплик этерчады. - Вакансияланы саны кёп, аз бола туруучуду. Болсада иги жер юч кюнден кёп турмайды. Ярмарканы чеклеринде Къабарты-Малкъар къырал университетде усталыкъ сайларгъа болушурча тюбешиуле бардырыладыла. Ол санда мектеплени выпускниклерине мастер-классла ётдюрюледиле. Бу жол ярмаркагъа юч минг школчу къатышханды. Мен оюм этгенден, адамны гитчелигинден окъуна бир тюрлю усталыкъгъа эсин бурургъа керекди -дегенди КъМР-ни Иш бла жалчытыу арасыны таматасы Татьяна Канунникова. КъМР-ни Урунуу эмда социал къоруулау министри Асанланы Алим билдиргенича, мында соискательле иш бла жалчытханлагъа бетден-бетге тюбеп ушакъ этедиле. Кеслери бир тюрлю иш бла кюреширге сюйгенлеге, саулукълары бла байламлы чекленнген онглары болгъанла, энчи аскер операциягъа къатышханла, къошакъ халда усталыкъ алыргъа сюйгенле да экспертледен эсгертиуле аладыла. Бирси регионлада иш излегенле да тюзюнлей халда ала бла ушакъ этерча онг тапдырылады. Аны бла бирге тамата бла ишчини арасында ангыласузлукъну кетерирча урунуу законодательствону чеклеринде тюрлю-тюрлю соруулагъа да къаралады. Ярмаркалада, ишчи жерледен сора да, бюгюнлюкде Социал къоруулау ара къаллай жумушланы тамамлагъанын билирге жарарайды. Эсге сала айтсакъ, быллай ярмарка биринчи кере бардырылады. Ол эки кюнню ичинде бир жолгъа 940 майданда ётерикди. Анга иш бла жалчытхан 9,2 минг субъект къатышырыкъды. Ярмарканы экинчи кесеги быйыл 23 июньда боллукъду.
Поделиться:
Читать также:
02.04.2024 - 09:15 →
Тыш къыралла эмда башха регионла бла байламлыкъла кюч ала барадыла
01.04.2024 - 08:50 →
Гитче эмда орта бизнесни магъанасы уллуду
30.03.2024 - 12:00 →
«Не къыйын кюнде да сайлауума сокъуранмагъанма»
30.03.2024 - 08:50 →
Инвестициялагъа – энчи эс
05.03.2024 - 09:28 →
Инфляция азая барады
|