Иш табаргъа эм социал жумушланы юсюнден билирге да жарарыкъды

КъМР-ны Урунуу эмда социал къоруулау министерствосундан билдиргенлерича, 14 апрельде  10.00 сагъатда Нальчикде Къырал концерт залда «Россейде ишлеу. Амалланы кезиую. Бюгюн бирге тамблабызны къурайбыз» деген ат    бла  ишчи жерлени битеуроссей ярмаркасы ётерикди. Аны магъанасы иш бла жалчытхандан сора да, тийишли эсгертиуле берип болушлукъ тапдырыргъады.  

 Анга  промышленность, эл мюлк,   саулукъ сакълау, билим бериу, къурулуш эм башха бёлюмледе уруннган, ишчи кадрла керек болгъан, предприятияла  бла организацияла къатышырыкъдыла.   

Аны чеклеринде иш къоллу болургъа излегенле  организацияла бла  толуракъ шагъырейленирге  онг табарыкъдыла. Ол санда къаллай усталыкъ изленнгенин, айлыкъны,  социал гарантияланы, усталыкъларын  ёсдюрюрча  программаланы юсюнден да билаллыкъдыла. Андан тышында  «Демография» миллет проектге кёре къошакъ халда усталыкъ алырча онг да кёплеге себеплик этерикди.

Мында соискательле иш бла жалчытханлагъа бетден-бетге тюбеп ушакъ  эталлыкъдыла.  Кеслери бир тюрлю иш бла кюреширге сюйгенлеге, саулукълары бла байламлы чекленнген онглары болгъанла, энчи аскер операциягъа къатышханла, къошакъ халда  усталыкъ алыргъа сюйгенле да экспертле эсгертиуле берликдиле. Аны бла бирге тамата бла ишчини арасында ангыласузлукъну кетерирча урунуу законодательствону чеклеринде тюрлю-тюрлю соруулагъа къараргъа   жарарыкъды. 

Ярмаркадада ишчи жерледен сора да, бюгюнлюкде Социал къоруулау ара къаллай жумушланы тамамлагъанын билирге жарарыкъды. Анга  Урунуу жаны бла къырал инспецияны  КъМР-де бёлюмю да къатышырыкъды.