Тынгылылыкъ бла усталыкъ – аны айырмалы ышанлары

Халкъын багъалатхан,  билими, хунерлиги бла да анга жарагъан адамгъа тюбесенг, таза хауаны солугъанча боласа. Эштада,адамланы юлгюлю атламлары, жарашыулу халлери,огъурлу ишлери, акъыл сёзлери болурла  жашауну къууаты, магъанасы да. Мызыланы Алимни жашы Исмайыл ма  аллайладанды деп, таукел айтыргъа боллукъбуз.

Жер башында не иги ышанла бар эселе да, аланы Исмайылны юсюнде кёрлюксе. Ол  врач болуп ишлегенли, ненча адамны  аягъы юсюне  салгъанды.  Аланы санап-саны жокъду.  Анданды Мызы улугъа жер-жерледе да махтау бергенлери, аны оюмун, сынауун, фахмусун да  сурагъанлары.  Аны сыйы не уллу къуллукъчудан да ёргедеди. Нек? Ол адамлагъа жарагъанлай , болушханлай келгени, саулукъларын  къайтаргъаны ючюн.

Биргесине ишлегенлеге да бек сакъды. Юлгюсю, сёзю бла да себепик этеди, къуруда къайгъыргъанлай турады.

Исмайылгъа эм уллу байлыкъ адамланы саулукъларыды. Операцияны кезиуюнде врачны эси саусузну аягъы юсюне салыргъа бурулуп къалады.  Врачла къыйын саусузлагъа, ёлюмге да юйренип къалады дейдиле. Исмайылгъа къарасанг, ол сёзлени тюзлюклерине ишекли боласа. Хар ёлген аны жюрегине жара салады. Ол операциядан сора да солургъа ашыкъмайды, саусузну къатында мычыйды. Врач ауругъанны къатында ышарып, жашау кёллю болуп айланса, саусузгъа тынчыракъ болады. Исмайыл аны иги биледи, алай да андан этеди.

Мызы улу  узакъ тау эллени биринде – Булунгуда - туугъанды, анда школну айырмалы бошагъанды. Ызы бла Къабарты-Малкъар къырал университетни медицина факультетине киргенди. Ординатураны бла аспирантураны  Дондагъы Ростовда бошагъанды. Илму ишин а  Краснодарда Къобан медицина институтда къоруулагъанды. Окъууун бошагъанлай, артха, туугъан республикасына, къайтып,  мында атын белгили этеди. Андан бери иги кесек заман озгъанды, аны даражасы уа бийикден бийик бола барады.

Анга ма бу шартла да шагъатлыкъ этедиле:  медицина илмуланы доктору, КъМКъУ-ну медицина бёлюмюню деканы, профессор. Университетни клиникасыны директору, факультет эмда эндоскопия хирургияны кафедрасыны таматасы. Къабарты-Малкъар Республиканы илмусуну сыйлы къуллукъчусу, Естестволу илмуланы россейли академиясыны, Естестволу илмуланы бла искусстволаны Петровский академиясыны академиги, хирургланы Къабарты-Малкъар биригиулерини председатели.

Исмайылны юсюнден жазар умут бла  ол ишлеген больницагъа баргъанма. Алай тюбешмедик: ол кюн аны операция кюню эди. Аны сакълап тургъан уллайгъан тиширыу, мени Мызы улун сурай келгеними эшитип, врачны махтап башлайды: «Сау къаллыкъма деп умутум жокъ эди,  алай бу жаш салды мени аягъы юсюме. Сау болсун! Сабийле ол энтта саулугъунга бир къараса эди, дегендиле да, аны ючюн келгенме, ансы бир затым къыйнамайды, игиме. Кесин да  кёрюрге  сюеме, аны себепли, даулашмай,  келип къалгъанма»,- дейди.

Экинчи кюн да барама больницагъа. Анда уа къаршы жууукъларыма тюбейме. Аланы аналарын да Мызы улу  жаргъанын билеме.  Саусузну кёре палатасына киргенлей, анда жатханла, бир бирге ал бермей, хирургну махтайдыла. Жууукъларым а: «Бек ыразыбыз, анабызны аягъы юсюне салды. "Къолундан бал тамгъан" деп, ма анычалагъа айтадыла. Анабыз кюн  сайын Мызы улун ашыгъып сакълайды, ол палатагъа кире келгени бла  ауругъанын да унутханча болады»,-дедиле.

Исмайыл бла ишлеп тургъан жаш врач Къумукъланы Магомет да,анга ыразылыгъын билдире: «Ол  керти адамды - ишинде, жашауунда да ким да ышанырча эмда базынырча. Бизге,биргесине ишлегенлеге,  уллу себеплик этеди, онг тапдырады, керек заманда къарындашлыкъ да этеди. Ишни юсюнде  къалай тап боллугъуну жолун эринмей, эрикмей, арымай юйретгенлей турады, сау болсун», - дейди.

Мени атам -  103-жыллыкъ къарт Габоланы Аслан а -  Мызы улугъа уллу хурмет этгенин, аны бла ёхтемленнгенин айтханлай турады.  Аны юсюнден газетге жазыгъыз деп да ол тилеген эди.

Мызы улу бла сабийликден да шуёхлукъ жюрютюп келген Къонакъланы  Малик да аны юсюнден былай айтханды: «Дунияда таза жюрекли, тюз ниетли адам бар эсе, ол Мызы улуду. Кёп жумушлада биз биргебиз, тюз къарындашымча кёреме,тенглерибизни арасында намысы, сыйы бийикди. Менсинмеген, уллугъа ,гитчеге   сёз таба билген, махтау бузмагъан таза жашды.  Кёп  жаны бла бизге  юлгюдю.  Аллай тенгим бла  бек ёхтемленеме».

Атасы, жаннетли болсун, дуниясын алышханды, анасы Газаланы Мариям,  жашыны  сёз нёгери,  оноучусу  да олду. Исмайыл аны кёлюн алып жашайды. Юй бийчеси Хапаланы Аминат бла бирге ала эки къыз ёсдюргендиле ,аланы, кеслерича, адепли юйретгендиле.  Ата бла ана да алагъа, аладан туугъанлагъа къууана жашайдыла.