Къутхарыучуларыбыз биринчиле

Бу кюнледе Нальчикде  «Автомобиль транспортда авариялада къутхарыу ишлени бардырыуда бек кючлю командасы» деген регион эришиуню 2-чи  кезиую ётгенди. 

Ол  Абхазия  майданда  къууанчлы  халда ачылгъанды. Анга къатышханланы алгъышларгъа  РФ-ни МЧС-ини КъМР-де Баш управлениясыны таматасы Михаил Надёжин, КъМР-де ич ишле министрни орунбасары Назир Мамхегов, жырчы эм 
депутат Текуланы Амур, башхала да келген  эдиле. 

– Эки кюнню ичинде бардырылгъан эришиуле  хайырлы ётерле деп ышанама. Ол алай болур ючюн а, биз битеу кючюбюзню салгъанбыз. Бу ишге дагъыда Къырал автоинспекция да къатышады да, аны келечилери къурарыкъ мастер-классла да былайгъа келгенлени сейирлерин къозгъарла деп ышанама, – дегенди Михаил Надёжин.

 Ол кюнледе кеслерини хунерликлерин Шимал-Кавказ федерал округну 13 регионундан къутхарыучула кёргюзтгендиле. Къабарты-Малкъарны атындан а анда Элбрус излеу-къутхарыу отряд  къатышханды. Бу жол бизни жашлагъа жетген болмагъанды. Жана тургъан автомобильде болгъан адамны терк эм жашаууна къоркъуусуз чыгъарыу, биринчи болушлукъ тапдырыу жаны бла  да ала биринчиле болгъандыла.

Эришиулени сюзюуде анга къатышханла къаллай терс ишле этгенлерине да аслам эс бёлгендиле. Аллай кемчиликле жибергенлени балларын да азайтхандыла. Андан сора да,  салыннган борч  не заманнга толтурулгъанына да энчи эс бурулгъанды. Нек дегенде жол-транспорт авариялада хар такъыйкъа да адамны жашауу бла   къаты байламлы болады. Битеу ол борчланы бийик  даражада тамамлап, бизни жашла бек кючлюле болгъанларын энтта  бир кере кёргюзтгендиле.

Экинчи эм ючюнчю жерлеге уа Ингушетияны бла Къарачай-Черкесни келечилери чыкъгъандыла.