Тызылда табийгъатны тазаларыкъдыла

«Eco_love_elbrus» деген  къымылдау къурап, эллерибизде кёп экология акцияла бардырыладыла. Алагъа асламында табийгъатыбызгъа жарсыгъан, аны тамблагъы тёлюлеге сакъларгъа кереклисини къайгъысын кёрген жаш адамла къатышадыла. Бу къауумгъа башчылыгъ а Жазаланы Фатима этеди.

Бу къауум ахыр кере Яникой элде 26 мартда бардырылгъан ишлеге тири къатышханды. 30 апрельде уа ала Тызыл ауузуна тебирерге деп турадыла. 

Фатима билдиргеннге кёре, тёгерекни кир-кипчикден тазалагъандан сора, ала «тёгерек стол» да бардырыр муратлыдыла. Анда къымылдауну мындан ары иши сюзюллюкдю. Салыннган борчланы жашауда къалай бардырыргъа кереклисине да энчи эс бёлюнюрюкдю.

Къымылдауну акциясына хар сюйген да къатышыргъа боллукъду. Туризм айный баргъаны бла бирге, табийгъатда кеслеринден сора кёп кир-кипчик къойгъанланы да саны ёсе барады. Аны себепли, ауузларыбызыны келир тёлюлеге не халда къоярыгъыбыз бизни хар бирибизни да къолубуздады.

Бу ишге къатышыргъа сюйгенле биргелерине къол къапла алсала иги боллукъду. Алайды да, келигиз, магъаналы ишден артха турмайыкъ.