Эки халкъны бирлешдирген кюн

Жыл сайын экинчи апрельде Россейни бла Беларусьну халкъларыны бирлешиу кюню белгиленеди. Ма ол кюн 1996 жылда эки къыралны президентлери Борис Ельцин бла Александр Лукашенко Москвада Россейни бла Беларусьну Жамауатын къурау келишимге къол салгъан эдиле.

Къабарты-Малкъарны ол къырал бла сатыу-алыу, экономика эмда социал-культура байламлыкълары эрттеден келедиле, деп белгилегендиле регионну Экономиканы айнытыу министерствосунда. Ахыр жыллада ала андан ары айный барадыла. Бизни республика 2020 жылда Беларусь бла эки жанына хайырлы Келишим къурагъан эди. Аны бла сатыу-алыу иги да кенгергенди. Къабарты-Малкъардан ары юч кереге аслам продукция жиберилип башлагъанды. Сёз ючюн, промышленность предприятияла Беларусьха тёрели халда чыгъаргъан товарларын ашырадыла, ол санда: налмаз инструментле, ток жипле, къагъыт, тюрлю-тюрлю оборудование.

Агропромышленность бёлюмде байламлыкълагъа бютюнда уллу магъана бериледи: республика ары нартюх эмда къудору урлукъ сатады. Дагъыда алмала, татлы ашарыкъла, гара суула, консервала, нартюхден жарашдырылгъан крахмал да. Беларусьдан а бери женгил эмда аш-азыкъ промышленностьлада чыгъарылгъан, сора дагъыда темирден этилген продукция, лифтле, энчи эмда эл мюлк техника келтиредиле. Сёз ючюн, былтыр республика 75 трактор, тёрт комбайн эмда онюч лифт сатып алгъанды анда.

Маданият, туризм, курортлада багъыу эмда солуу бёлюмледе да байламлыкъла иги ёсюм кёргюзте барадыла. Къабарты-Малкъарда беларусланы «Биригиу ючюн - Сябры» жамауат къымылдаулары ишлейди. КъМР-ни Башчысы эмда Правительствосу Беларусь Республиканы къарындаш халкъын бу белгили кюн бла алгъышлайдыла, арабызда сатыу-алыу – экономика, социал-культура байламлыкъла, сора дагъыда огъурлу къоншу халла андан да ары айны барлыкъларына ышанадыла.