Къутхарыу жаны бла усталыкъ алыргъа сюйгенлеге

Россейни МЧС-ни Къабарты-Малкъарда Баш управлениясында ведомствону бийик усталыкъ билим берген учрежденияларына курсантланы конкурсу башланнганды. Управленияда комиссия къуралгъанды, абитуриентлени ата-аналарына учреждениялагъа кириуню жорукълары ангылатылгъандыла.

Ведомствону учрежленияларында окъуу хакъсызды, курсантланы битеу кереклерин къырал жалчытады. Окъуугъа кириу экзаменлеге толу орта неда орта профессионал билим алгъанла, саулукъларында чурум болмагъанла эм энчи, ишчи шартлары бла къуллукъ этиуге жараулу адамла жибериледиле. Ала ЕГЭ-ни къалай бергенлерине къаралырыкъды, дагъыда къошакъ экзаменлени, психология тестлени ётерге эм физкультура нормативлени берирге керек боллукъду.

Усталыкъ билим «от тюшюуге къоркъуусузлукъ» жаны бла бериледи, окъууну бошагъанла вуздан «ич службаны лейтенанты» чын бла чыгъадыла, ала артда управленияны бёлюмлеринде орта къуллукълада ишлеяллыкъдыла.