Солууну игилендирир амалла

Республиканы Курортла эм туризм министерствосундан билдиргенлерине кёре, Техника жумушланы толтуруу эм метрология жаны бла федерал агентствону буйругъу бла туризмни жумушларын тамамлауда  жангы стандарт кийириледи. Анга тийишлиликде къонакъ юйлени къауумлагъа жыйышдырыуда жангы излемле салынадыла.

 Ата журтлу туризмни айнытыу бла байламлы къонакъ юйлени саны да ёсгенди, бютюнда уа «Все включено» жорукъ бла ишлегенле аслам болгъандыла. Алай эндиге дери ала къаллай жумушла тамамлагъанларын, аланы качестволарын кеслери белгилегендиле, ол а талай болумлада адамланы сакълауларына келишмегенди. Ол хыйсапдан былтыр Петербургда халкъла аралы экономика форумда къонакъ юйлеге бирча излемле салыргъа оноу дурус кёрюлгенди. 

Дунияда эм ахшы сынамны мурдоргъа салып, «Всё включено» шартха тийишли халкъла аралы жорукъланы да толтуруп, стандарт жарашдырылгъанды. Анга кёре фатарланы санына эм халларына, солугъанланы къаллай аш-азыкъ бла сыйлагъанларына, мекямны инфраструктурасына, сабийлеге деп къуралгъан онгларына, спорт бла кюреширге залларына, бассейнлеге, аквапарклагъа, спа-жумушлагъа, адамланы кёллерин кётюрюрча бардырылгъан мероприятиялагъа–аланы барысыни да излемле салынадыла.

Росстандартны башчысы Антон Шалаев айтханыча, стандартны кийириу къонакъ юйледе жалчытылыннган жумушланы качестволарын игилендирирге, къыралны ичинде туризмни айнытыргъа эм тышындан келген туристлени кёбейтирге, россейли турист продуктха сейирни ёсдюрюрге себеплик этерикди. Стандарт «Туризм эм къонакъбайлыкъны индустриясы» миллет проектни, 2035 жылгъа дери РФ-де туризмни айнытыуну стратегиясыны чеклеринде жарашдырылгъанды.