Битимчиликни юсюнден хайырлы ушакъ

Республиканы «Жетишим» деген билим бериу арасында «Битимле – тёгерекдеги къудуретни халын кёргюзтген затла» деген темагъа лекция бардырылгъанды. Школчулагъа лекцияны Къабарты-Малкъарны аграр университетини агрономия факультетини профессору Ирина Ханиева окъугъанды. Жаш тёлюню аллына чыгъып вузну талай келечиси да сёлешгенди. Ол санда ма была: Россейни Президентини эмда КъМР-ни Башчысыны стипендияларына тийишли болгъан, «УМНИК» программада грант хорлагъан Забакъланы Азамат, агрономия факультетни сабанчылыкъ къауумуну башчысы Джуртубайланы Абдулкерим эм ары кирген Аслан Гучаев.

Университетден билдиргенлерича, ала бу лекцияны «Алимле школда» деген битеуроссей акцияны чеклеринде къурагъандыла. Алай ары дери да бу факультетни келечилери школчула бла тёрели халда тюбешип тургъандыла. Сабийле да вузну бёлюмюню илму ишине кёл салып къатышыргъа сюйюучюдюле. Анга уа ала конкурслада бла конференциялада хорлагъан къадар сертификатла, грамотала, дипломла шагъатлыкъ этедиле.

Алай бла профессор школчулагъа лекциясын окъуп бошагъандан сора, студентле ала бла илму тинтиулени, ол жаны бла не жангы хапарла болгъаныны юсюнден сёлешгендиле. Ызы бла озгъан жылны эсеплерин чыгъаргъандыла, мындан арысында бирге не бла кюрешириклерин да белгилегендиле.