Алыучуланы сейирлерине къайгъырадыла

Озгъан жыл Россельхозбанкны Къабарты-Малкъарда бёлюмю «Татыулу байрым кюн» деген акцияны чеклеринде республиканы эл мюлк товар чыгъарыучулары 350 минг сом багъасы аш-азыкъ сатхандыла. Сагъынылгъан   жумушла бла байламлы ярмаркала банкны  саты-алыу этген битеу бёлюмлеринде бардырылгъандыла эм ары отуз эки биригиу къатышханды.

 «Татыулу байрым кюнлени» бардыргъанда финанс учреждения бла байламлыкъ жюрютгенле  фермерле жарашдыргъан аш-азыкъланы татыуларын кёрюрге онг тапхандыла эм алайда окъуна аланы учуз багъалары бла сатып алгъандыла. Эл мюлк товар чыгъарыучула бла  ачыкъ ушакъла этип, берген сорууларына жууапла алгъандыла.

 «Бизни ишчилерибиз клиентлерибизге фермерле чыгъаргъан ашарыкъланы къалай эм къайда сатып алыргъа ангылатхандыла, ол санда Россельхозбанкны интернетде  ачылгъан «Кесибиз чыгъаргъан товарла» деген   майданында мажарыргъа боллукъду. Ол жумушну тамамлар ючюн финанс учрежденияны официал сайтына кирип приложенияны орнатыргъа эм эсепге тюшерге керекди», -деп чертгенди Россельхозбанкны Къабарты-Малкъар Республикада бёлюмюню таматасы  Алим Сокуров.  Аны юсюнден бизге банкны пресс-службасы билдиреди.

Бизни корр.