Къоркъуусузлукъну жорукъларына тюшюндюрюу

Къабарты-Малкъар къырал университетде (КъМКъУ) предпринимательлик жаны бла усталыкъны сайлагъан студентле къоркъуусузлукъну сакълауну юсюнден биринчи отчётларын этгендиле. Аланы ишлерине МЧС-ни Баш управлениясыны, «Мени бизнесим» араны, Курортла эм туризм, Табийгъат байлыкъла эм экология министерстволаны, Тау жерлени экологиясын тинтген илму-излем институтну келечилери багъа бичгендиле.

КъМКъУ-да бюгюнлюкде предпринимательликге хазырлагъан юч бёлюм барды: «Гиппократ бизни блады», «Эльбрус», «Альтаир». Алада 1200-ден аслам студент юйренеди. Биринчисинде саулукълу жашау бардырыуну ниетин кенг жайыу, жукъгъан аурууланы азайтыу, жамауатны эпидемиология жаны бла билимин ёсдюрюу, социал эм ниет проблемаланы тинтиу бла кюрешедиле.

«Эльбрусну» программасы экология предпринимательликни айнытыугъа, аллай проектлени бла башламчылыкъланы бардырыугъа жораланыпды. «Альтаир» а табийгъат эм техноген къыйынланы къозгъагъан сылтауланы кетериу, ала салгъан хатаны азайтыу бла байламлыды.

Этилген отчётла ахшы белгилеге тийишли болгъандыла, деп билдиредиле МЧС-нм Баш управлениясыны пресс-службасындан.