Туугъан жерлерини юсюнден – суратла, буклетле

Эколого-биология арада «Мени жерим – Къабарты-Малкъар» республикалы конкурсну эсеплери чыгъарылгъандыла, хорлагъанла саугъаланнгандыла. Курортла эм туризм министерствону жамауат эм асламлы органла бла байламлыкъла жюрютюу жаны бла бёлюмюню таматасы Ольга Погребняк айтханнга кёре, аланы муратлары жаш тёлюню туризмни юсюнден оюмларын, сейирлерин, ала кеслерин боллукъ заманда къалай кёргенлерин билирге эди.

Конкурсха устазларыны башчылыкъларында 14-18-жыллыкъ окъуучула къатышхандыла, ала  битеу да 37 иш жибергендиле, финалгъа 7-си чыкъгъандыла. Эм иги ишле «Гитче Ата журтуму тин эм экология тёрелери», «Этноэкология тинтиуле», «Эко-гид», «Этноэкология журналистика», Этноэкология бла бусагъатдагъы жашау» номинациялада сайланнгандыла.

«Эко-гид» номинацияда регионну маданият эм табийгъат хазнасыны бла шагъырейлендирген ишлеге къаралгъанды. Анга кёре туугъан эли Каменномостскоеге ахшы экскурсия программаны Эльвира Мурзаканова жарашдыргъанды. Ол элини ариу жерлерин белгилегенди, буклет ишлегенди. Энчи Сарбашланы Фатиманы Чегем районну тамашалыкъ жерлерини бла Къазакъланы Людмила Жемталаны юсюнден ишлери белгиленнгендиле.

Конкурсха къатышханланы барысына да министерствону грамоталары бла саугъалары берилгендиле.