Эльбрусну тау-магъадан чыгъарыучу комбинатыны къурулушу бла шагъырейленнгендиле

Россейни Правительствосуну Председателини орунбасары Александр Новак бла КъМР-ни Башчысы Казбек Коков Эльбрусну тау-магъадан чыгъарыучу комбинаты бла шагъырейленнгендиле.

 Республикада уллу инвестиция проектни бардырыу  2021 жылны   октябрни аллында башланнганды. Бюгюнлюкде тау-магъадан комбинатны жол инфраструктурасын къурау эм къурулуш майданын хазырлау ишле тамамлана турадыла.

Эльбрус тау-магъадан комбинатны генеральный директору Игорь Ушаков сагъынылгъан проектни эм къурулуш ишле къалай бардырылгъанларыны юсюнден толусунлай айтханды. Проект эки жерде къураллыкъды. Тырныауузда магъаданны чыгъырыу эм тазалау производство, Невинномысскде уа гидрометаллургия производство боллукъду.

 Проектни бардыргъан кезиуде жер тюбюндеги рудникни жангыдан ишлерикдиле, анга кёре экология инфраструктура да  къураллыкъды.

 Игорь Ушаков белгилегеннге кёре, комбинат Шимал Кавказда эм уллу промышленный предприятияладан бирине саналырыкъды.

Толусунлай проектни багъасы 25 миллиард сом турады, ал тергеулеге кёре,  жылгъа 1,5 миллион тонна магъадан чыгъарыллыкъды   эм жарашдырыллыкъды. Планнга кёре, 700 жангы ишчи жер къураллыкъды. Комбинат 2023 жылда хайырланыргъа берилликди, 2026 жылда  уа толусунлай кючюне ишлеп тебирерикди. Биригиу толу кючю бла  ишлеп тебирегенде тюрлю-тюрлю бюджетлеге ётдюрген налог тёлеулери жылгъа 300 миллион сомгъа жууукъ боллукъдула, деп билдиргендиле республиканы оноучусуну пресс-службасындан.

Бизни корр.