Къабарты-Малкъарда жолланы аслам халда жангыртхандыла

Россей Федерацияны Правительствосуну вице-премьери Марат Хуснулинни башчылыгъында Регионланы айнытыу жаны бла правительстволу коммиссияны жыйылыуу болгъанды.

Видеоконференция амал бла ары КъМР-ни Правительствосуну Председателини биринчи орунбасары Муаед Кунижев эм КъМР-ни  транспорт эм жол мюлк министри  Аслан Дышеков къатышхандыла. 

Жыйылыуда субъектледе «Къоркъуусузлу качестволу жолла» деген миллет проектни шёндюгю кёрюмдюлери сюзюлгендиле. Субъектлени араларында жолла ишлеу бла байламлы миллет проектни арасында бардыргъан ишлерини юсю бла Къабарты-Малкъар Республика белгиленнгенди.

Юсюбюздеги жылда миллет проектни чеклеринде 116 километр регион эм жер-жерли автомобиль жолла тап халгъа келтирилликдиле, ол санда жоллада къоркъуусузлукъну жалчытыу бла байламлы комплексли ишле тамамланырыкъдыла. Орта эсеп бла 37 километрде чыракъла жанарча этилликдиле, юч километрге жууукъ жерде темир чалдишле орантырыкъдыла эм жангы миллет стандарт бла 116 адамла жолладан ётген жерле Т-7 светофорла салынып жарашдырыллыкъдыла.

Быйылгъы жылда финансла жаны бла жалчытыу 1,9 миллиард сомгъа жууукъ болады, аладан 432 миллион сому- федеральный бюджетни, 1,4 миллиард сом-регион эм 48 миллион сом-жер-жерли бюджетни ахчаларыдыла.

КъМР-ни Башчысы К. Коковну башламчылыгъы бла юсюбюздеги жылда республика къошакъ халда федерал бюджетден эки кере ахча алгъанды, аны хайырындан программагъа бир ненча жангы объектлени къошаргъа онг чыкъгъанды.

2021 жылда ремонт этерик объектлени программасына кирген ишле бошала турадыла. Жоллада бардырыллыкъ   183 объектде бюгюнлюкге 170 ишле толусунлай бошалгъандыла.  Къалгъанларында техника хазырлыкълары 92 процентден атлайды, алагъа бёлюннген ахчаланы да 96,5 проценти  хайырланнганды.

Бизни корр.