Инвестициялы счётлагъа сурам ёсгенди

Ара шахарда биржаны билдириуюне кёре, Къабарты-Малкъарда жашагъанла, озгъан жылны ахырына он мингден артыкъ энчи инвестиция счёт ачхандыла. Саулай Шимал Кавказда уа аланы саны жюз мингден атлагъанды.

«Бизни республикада быллай счётлагъа сурам ёсе баргъанын иги кесек заманны кёребиз. Озгъан декабрьде бу финанс амалны энтта да алты жюзден артыкъ адам сайлагъанды», - дегенди Россейни Банкыны КъМР-де бёлюмюню башчысыны орунбасары Балаланы Расул.

Ол дагъыда инвестицияла жаланда файда угъай, къоранчла келтирирге боллукъларын да эсгергенди: «Аллай къоркъуу, инвесторну билимине, сынамына кёре чыгъады. Не къадар иги ангылау бар эсе, ол къадар кёп амал табаргъа боллукъду. Дагъыда бир затны билирге керекди: сизники болгъан брокерден неда управляющий компаниядан лицензиялары сыйырылса, счётха салгъан ахчагъыздан къуру къалыргъа боллукъсуз. Нек дегенде, къырал быллай финанслагъа жууаплы тюйюлдю, вкладланы страхованиясын этген агентство да алагъа къарамайды».

Законнга тийишлиликде, адамда жаланда быллай бир счёту болургъа боллукъду. Анда уа бир миллион сомгъа дери тутаргъа эркинлик бериледи. Счётну, айтханыбызча, лицензиялары болгъан брокер неда управляющий компания бла ачаргъа боллукъду.