Эл аллында хурмети жюрюйдю

Къарты болгъан юйню берекети не заманда да башхаракъ бола келгенин жашау кеси баямлагъанды. Ала жаланда сёлешген сёзлери бла угъай, ёз къылыкълары бла окъуна юйрете, ол халкъыбызны  ахшы ышанларындан бири болуп къалгъанды.

Бюгюнлюкде кесибиз юйюрле ёсдюре эсек да (айып этмегиз), сабийлигибиз озгъан жерни орамлары бла бара, къарамыбыз ныгъышлада олтуруучу аппаланы бла ынналаны излейди. Аланы жарыкъ ышарыуларын, башынгы  сылай, таза ниетден толу алгъышла этгенлерин да эсгересе. Сора, къалай эсе да, бир хычыуун сезим бийлей, жаланда элинги угъай, саулай да миллетинги окъуна байлыгъы, берекети ма  алада, ол чакълада болгъанына тюшюне, барысын  да тансыкълайса.

Мени бюгюннгю жигитим Къайгъырмазланы Шерипа да Хабазны сыйы-намысы жюрюген адамларындан бириди. Ол дуния жарыгъын да мында атасы Улбашланы Домпаны юйюрюнде кёргенди. Малкъар халкъ туугъан  жеринден зор бла кёчюрюлгенде аналары Чочуйланы Фердаус юч къызчыгъы бла бирге Къыргъызстаннга тюшген эди. Жарсыугъа,  баш иеси ары дери окъуна эртте ауушуп, аланы кесинлей ёсдюргенди.

Энди бюгюнлюкде сагъынылгъан элибизни иги кесек тёлюсюн харф таныргъа,  жазаргъа юйретип, башланнган классланы окъутуугъа къыйын салгъан огъурлу тиширыу кеси школгъа Сары Булакда барып тебиреген эди. Анда алты жылны тауусханды. Халкъыбызгъа туугъан жерине къайтыргъа эркинлик берилгенинде  уа ала бери Хабазгъа келгендиле. Шура да (эл анга алай айтады) мында жетинчи классны бошап, ызы бла Нальчикде педагогика училищеге киреди.

Алай бла, къадарын окъутуу-юйретиу иш бла байламлы этип, атасыны осуятын да толтурады. Кеслери билим алыргъа термилип къалгъан тёлюню келечилери ёсдюргенлери аладан эсе жетишимли, халкъларына жарагъан, хурметли адамла болуп ёсерлерин сюйгендиле.

Шура Домпаевна да 48 жылны бир жерде - жашагъан элини орта мектебинде - таймай урунуп, кёп кере Сыйлы грамоталагъа, «За доблестный труд» майдалгъа да тийишли болгъанды. Анча заманны ичинде ол окъутхан сабийлени араларында уа бизни барыбызгъа да белгили, таныулу  инсанла да бардыла. Сёз ючюн, КъМР-ни Правительствосуну  Председатели Мусукланы Алий, Хабазны Тиширыу советини башчысы Узеланы Аминат да аланы санындадыла.

Сынамлы педагог бардыргъан дерслеге къараргъа уа шахардан, районну эллеринден жаш устазла келип, аны амалларына да юйреннгендиле. Ол а сабийлеге берген билими терен болур, ала хар заманда да окъуулу инсанлагъа саналыр ючюн жангы затлагъа  кеси да тюшюнюп тургъанды. Ол ишин бу ызда бардыргъаны ючюн а школну директору Къайгъырмазланы  Байбатыр да анга ыразылыгъын билдиргенлей, кёллендиргенлей  тургъанды.

Огъурлу тиширыу баш иеси Мустафа бла бирге эки жаш бла къыз ёсдюргенди. Экиси да, школда уруна (юйюрню атасы  да математикадан, ОБЖ-дан да окъутуп тургъанды), юй тутхандыла, малгъа къарагъандыла, бахча да ишлегендиле. Эл жашау ол халда баргъаны баямды. Алай эсе да, ала сабийлени ишден къачмазгъа, чыныгъыргъа юйретгендиле. Адам кесин мёхелликге хорлатмаса, не жаны бла да тутхучлу боллукъларына ийнаннгандыла.

Къудурет Шерипагъа бла Мустафагъа толу насып  берип, туудукъла, аладан туугъанчыкъла бла да саугъалагъанды. Ала экиси да бирге жашап келгенли уа энди 60 жылгъа жууукълашханды. Алай эсе да, жыл санына да къарамай, анга уа сексенден атлагъанды,  мени бюгюннгю жигитим алыкъа да бахчада кюреширге угъай демейди. Айтханыбызча, бош олтурууну ол огъурламайды. Жашауну тутуругъуна халал къыйынны, биреуню затына сугъанакълыкъ этмеуню санап,  юйюрюн да ол ниетде юйретеди.

Бир ненча жылдан бери энди школда ишин къойгъан эсе да, окъуучулары аны унутмайдыла. Байрамла бла алгъышларгъа, жокъларгъа да сюедиле. Ол да аланы хар бирин да эсинде тутады. Анга жоралап, окъуучусу Ахматланы Ибрагим тёртюнчю классны тауусхан кезиуюнде (2005ж.) саугъалагъан назмуну да сакълагъанлдай турады.

Адам бу дунияда ишинден, юйюрюнден да къууанса, баям, ол эм уллу насыпды. Аны бла бирге уа анга узакъ ёмюр да берилсе. Къудуретни ахшылыгъындан, Шерипагъа къадар аллай жашауну саугъалагъанды. Дагъыда аммалларын, аппаларын да туудукълары багъалайдыла эмда хурметлейдиле. Ала экиси да юйню берекети болгъанларын сезгенлеринден сора да, алагъа саулукъ тежейдиле. Жюрек жылыуларын къызгъанмай, аллай насыпны алагъа буюрулгъанына шукур эте жашайдыла.