Музейни эрттегили китапла, башха тарых шартла толтурлукъдула

Иймам Абу Ханифа атлы Шимал-Кавказ къырал  университетни мурдорунда ислам культураны бла тарыхны музейин  къураргъа белгиленеди. Анга ахча  РФ-ни Президентини грант фондундан бёлюнюрюкдю.  «КъМР-де ислам культураны музейи» деген проектни республиканы  Муслийманларыны дин управлениясы хазырлагъанын айтырчады. 

Университетни ректору Чочайланы Шарафутдинни бизге айтханына кёре,  анга энчи отоу бёлюу жаны бла жумуша толтуруладыла.  «Быллай музей керек болгъаныны юсюнден эрттеден да айтылгъанды. Муфтият грант къытханы бла уа аны жашауда бардырыргъа онг чыкъгъанды. Шёндю уа  кёрмюч бла жамауат чырмаусуз шагъырей болурча мадарланы сюзебиз»,-дегенди ол.

  КъМР-ни Муслийманларыны дин управлениясыны башчысыны орунбасары Алим Сижажев бизге билдиргенича, музейде республикагъа ислам къалай сингнгенини, таулула бла къабартылыла диннге бурулгъанларыны юслеринден экспонатланы жыйышдырыргъа мурат барды.

- Ислам Малкъарда бла Къабартыда жайылгъан ёмюрлени ичинде бизни халкъла   бай хазна жыйгъандыла. Ол санда эрттегили межгитле сакъланнгандыла, дин тёрелени тамамлагъанда хайырланылгъан затла бардыла. Миллет тилледе жазылгъан дин китапланы уа артыкъда багъалы экспонатлагъа санаргъа боллукъду. Кесигиз да билесиз, кириллица кийирилгинчи,  кавказ халкъла арап харфланы жюрютгендиле.  Сёзге, малкъар адабиятны мурдорун салгъан акъылман Кязимни назмулары арап харфла бла жазылыпдыла. Ма быллай экспонатла жыйышдырыргъа мурат барды,-деп чертгенди Алим Сижажев.

Бюгюнлюкде алыкъа къурау соруула тамамланадыла.   «Шёндю биз шартланы жыйышдырабыз. Аллах айтса, жууукъ кезиуде республикада биринчи ислам музей ачыллыкъды»,-деп къошханды ол.Фатима.