Кир-кипчик атхан орунланы алышадыла

Кёп болмай Битеуроссей халкъ фронтну (ОНФ) Къабарты-Малкъарда бёлюмюню  келечилери Нальчикде  кир-кипчик атхан орунла эм ала сюелген жерле  санитар эм башха  мардалагъа келишгенлерин тинтирча рейд бардыргъандыла.

Аны чеклеринде жамауатчыла  Ингушская, Ногмов, Атажукин, Идаров,  Суворов, Тарчоков орамлада эм башха жерледе да болгъандыла.  Кертиси да, объектледе хал осалына кетгени, бакланы кёбюсю сынып, чирип тургъанлары, аны хатасындан багушну кёбюсю жерде чачылгъаны да ачыкъланнганды.  

- Багушну ташыгъан службагъа быллай  объектлени  тазаларгъа аслам кюч къоратыргъа эм къыйналыргъа тюшеди. Орунла жараусуз болгъанлары ючюн   машина кётюрген заманда ичиндеги  жерге тёгюледи, аны бла  тийреде санитар марда бузулады.   Ол себепден аланы жангыртыу республикада бек уллу  борчладан бириди. Алгъаракъда регион оператор бир-бир жерледе контейнерлени кеси ахчасына жангыртханды. Болсада, законда айтылгъаннга  кёре, къаты къалгъан-къулгъанла атхан жерлени игилендириу аны  борчуна кирмейди. Аны муниципал власть органла тамамларгъа керекдиле, - дейди ОНФ-ни келечиси Ислам Макоев.

Болумну юсюнден Нальчикни мэриясына да билдирилгенди. Анда   жууукъ заманда бир мадар этерге айтхандыла, ол санда   Суворов атлы орамда   жыйырмадан   аслам жангы  контейнер салыргъа.   

-Биз рейдлени экинчи кере да къайтарып бардыргъаныбызда  проблемалы жерле тапландырылгъанларын – баклагъа ремонт этилгенин неда жангылары орнатылгъанларын эслегенбиз.  Болсада Тарчоков орамда 56-чы эм 58–чи  эм Ногмов орамда 78-чи номерли юйлени  алларында уа  болум  тюрленмегени жарсытханды, -деп къошады ОНФ-ни келечиси.   

Жамауатчыла республикада бу жаны бла тапландырыу ишле тийишли халда бардырылырча къарагъанлай турлукъларын белгилегендиле.