Тазирни азайтырын сюе эсегиз, аны тёлегиз

   Озгъан ыйыкъда (5-11 январьда)   жолда жюрюуню жорукъларына бузукълукъла этилгени бла байламлы 12,4 мингден аслам терслеу бегим жарашдырылгъанды.   Салыннган тазирни битеу ёлчеми 7,2 миллион сомдан аслам болгъанды. 
   Эсигизге салайыкъ, административ тазирни 60 кюнню ичинде тёлерге керекди.   Аны болжалы сакъланмаса, терслеу материалла  сюд приставлагъа  бериледиле. Законлагъа тийишлиликде,  ол заманда аны ёлчеми эки кереге кёбейтиледи неда бузукъчуну хакъсыз 50 сагъат ишлетирге деген оноу чыгъарылыргъа да боллукъду. 
   2016 жылда кючюне кирген законнга кёре, административ тазирни тёлемегенни бир-бир эркинликлерине тыйгъычла салынадыла. Ол санда борч он минг сомдан кёп болса, аны машинаны жюрютюрге правалары сыйырылады. 437-ФЗ номерли федерал законнга кёре уа, терслеу бегим   20 кюнню ичинде толтурулса, ахчаны жартысын берип къояргъа боллукъду.  
    Сиз административ жууапха тартылгъаныгъызны бла къалгъаныгъызны РФ-ни Къырал автоинспекциясыны сайтында  неда аны бёлюмлеринде билирге онг барды. Дагъыда быллай шартланы къырал жумушланы бирикдириген порталында эсепге туруп неда кёп функциялы аралада  алыргъа да жарайды.