Гранат - кёгетлени патчахы

Буруннгу заманладан бери Кюн чыгъышда гранатны кёгетлени патчахына санап келедиле.Аны Вавилонда беш минг жыл мындан алгъа ёсдюрюп тургъандыла. Тюрлю-тюрлю аурууладан багъаргъа жарагъанын Гиппократ белгилегенди. Тыш кёрюмдюсю окъуна бирсиледен айырмалыды.

Бу кёгетни энчиликлери кёпдюле. Бюртюклери окъуна, багъалы ташчыкълагъа ушап, бирча ариу тюрсюнлюдюле. Алимлени оюмларына кёре, гранатны сууунда антиоксидантла чагъырда, кёк чайда, клюквада иги да кёпдюле. Глюкоза, фруктоза, клетчатка, танин, кальций, магний, марганец бла да байды. Андан сора да, фитонцидлери, В, С, РР витаминлери да бардыла.

Ол адамны этини къызыулугъун тюшюрюрге, къан басымлары уллу болгъанлагъа, аш орунлары, башлары терк-терк ауругъанлагъа, жётелден окъуна болушады. Жангы сыгъылгъан согун суу бла тенг ёлчемде къатышдырып, тамагъыгъызны кюннге юч кере чайкъасагъыз, ауругъаны терк кетеди. Тыш къабугъу бла ташчыкълары окъуна хайырлыдыла. Анда болгъан полифенолла адамны чегилеринде микробланы къурутадыла. Кёгетни ичинде жукъакъабукъларындан къатдырып, андан чай хазырласанг, нерваланы шошайтады. Андан сора да, аны сууундан кюн сайын жарым неда бир стакан ичсегиз, ол анемиядан болушады, къанда гемоглобинни иги да кётюреди.

Алай гранатдан сыгъылгъан согуна сууукъ суу къошуп ичерге керекди. Нек дегенде анда болгъан кислотала аш оруннга бла тишлеге заранлыдыла. Къабугъундан этилген дарман а, тюз мардасы бла хайырланылмаса, адамны кёзлерине, саулай санына-чархына да хаталыды.

Гранатны ташчыкълары бла бирге мардасы бла ашаргъа керекди. Сатып ала туруб а, уллу, жылтырауукъ, ауур болгъанларын сайлагъыз, аланы жарылгъанлары, таплары болмазгъа керекдиле.

Байсыланы Марзият хазырлагъанды.
Поделиться: