Письмо да жазарла, сёлешип да айтырла

Роспотребнадзорну Къабарты-Малкъарда Управлениясындан аны атындан хыйлачыла телефон бла сёлешген неда письмо жазып жиберген кезиуле тюбегенлерин билдиргендиле. Ведомствону жер-жерли бёлюмлерини биринде айтханларыча, энчи адамлагъа эмда предприятиялагъа бла организациялагъа Управленияны башчысыны атындан письмола жиберилип, анда сизге административ тазир салыннганды, деп жазып, аны тёлеуню жалгъан реквизитлерин да кёргюзтедиле.

Ол себепден Роспотребнадзорда ишлегенле кимге да бу жаны бла бек сакъ болургъа, быллай шартланы юсюнден а мычымай алагъа эм правону къоруулау органлагъа билдирирге чакъырадыла. Административ тазир салыннганды деп письмо келсе уа, анда реквизитлеге тынгылы къараргъа керекди. Быллай тёлеу жаланда федерал Казначействону КъМР-де Управлениясыны счётуна барады. Алай дагъыда ишекли болсагъыз а, Роспотребнадзоргъа сёлешигиз.