Сыйсыз излемледен кери болуу магъаналыды

Белгилисича, Жай Олимпиада оюнла быйыл Парижде июль-август айлада ётерикдиле. Францияны ара шахарына бу спорт байрам 100 жылдан сора къайтханды.

Бу оюнлагъа Россейни командасыны санында 55 спортчу къатышыргъа боллукъдула, деп билдиредиле къыралны асламлы информация органлары. Алай россейлилеге Халкъла аралы олимпиада комитет (МОК) къурагъан бир къауум жорукълагъа сыйыныргъа керек боллукъду. Бизни атлетле бла бирге аллай чекле белоруслулагъа да салынадыла. Келигиз, бир къарайыкъ эм тинтейик аланы.

Алай бла, комитетни биринчи излеми байракъ бла байламлыды. Аллай болумну биз ахыр Къыш Олимпиада оюнлада да кёрген эдик эм анга бир кесек хазыр эдик дерчады. Ала ма бу сиз кёрген байракъ бла къытышыргъа борчлудула Оюнлагъа. Болсада МОК-ну оноулары аны бла чекленип къалмагъандыла: бу жол спортчуланы къыраллары да айтыллыкъ тюйюлдюле. Алагъа «Энчи нейтральный спортчу» деген ат берилликди. Эки къыралны да гимнлерини орунуна жаланда макъамлары согъулуп къаллыкъды.

Бек сейири уа неди десегиз, россейли эм белоруслу спортчула къытхан майдалла Олимпиада эсеплеге кирлик тюйюлдюле. Быллай сейир эм адамны ачыуун келтирген оноула бу жолгъа дери бир да кийирилмегендиле спортчулагъа. Тыш къыралланы политиканы бла спортну бир бирден айыра билмегенлери бек ачыу кёрюнеди.  Бу болум бла байламлы, жетишимлени аз да магъаналары жокъду спортчуну кесинден башха биреуге да.

Андан тышында да алагъа Жай Оюнланы ачылыуларына бла жабылыуларына къатышыргъа эркин этиллик тюйюлдю. Мен оюм этгенден, битеу бу жорукъла адамны сыйын тюшюрюрге деген амалладыла.  Алай бла тыш къыраллы политикле МОК-ну юсю бла Россейге дерт жетдирирге излейдиле. Хау, хар спортчу да Олимпиада оюнлагъа къатышыр мурат бла жашайды. Аны барыбыз да билебиз эм ангылайбыз. Алай адамны, къыралны да сыйларын эниш этген быллай жорукълагъа бой салыуну уа мен тюзге санамайма. Бир кесек ёхтем бола билирге керекди.

Дагъыда бир къауум асламлы информация органла билдиргеннге кёре, энчи аскер операциягъа жакъ басхан спортчуланы, тренерлени эм волонтёрланы Оюнлагъа къатышыр онглары боллукъ тюйюлдю. Андан сора да къырал аскер органла бла контрактлары болгъан спортчулагъа да быйылгъы Олимпиадагъа барыр амал жокъду.  

Бюгюнлюкде россейли спортчуладан жаланда 12-си квалификацияны ётгендиле.