«Энди аллайны киши сынамасын»

Яникойчу Таппасханланы Ахматны юйюрю кёчгюнчюлюкден туугъан жерибизге биринчи къайтханладан бири болгъанды. 1956 жылда февральда 20-чы съездде Орта Азиягъа бла Къазахстаннга кёчюрюлгенле туугъан жерлерине къайтыргъа боллукъдула, деген оноу чыгъарылгъанлай, Ахмат Азнаурович юйюн, малын да сатып, 6 сабийи бла келеди.

Таппасханланы юйюрде сабийледен бек тамата Нюра эди. Бюгюнлюкде ол Лашкута элде жашайды. Аны эсгериулери бла шагъырей этебиз.

«Кёчгюнчюлюкге дери Бакуменко деп биреу атабыз бла уугъа барып туруучу эди. Ууда ёлтюрген агъач тонгузланы атабыз анга берип болгъанды. 1956 жылда келгенибизде, юйюбюзде Бакуменко юйюрю бла тура эди. Не этерик эдик,  юйюбюзню аллы агъач коридор болуучу эди да, алайда орналабыз. Сабийлени араларында бек уллу мен эдим. 7 классны бошап чыкъгъан заманым эди. Кюндюз алайда аш-суу да этерге кюрешип, алай тура эдик. Кече уа къоншуда Кючменланы Мустафалагъа барып къалыучу эдик. Алай бла бир ауукъ заманны жашагъанбыз.

Сора 1957 жылда 9 январьда КъАССР-ни КъМАССР-гъа тюрлендириуню юсюнден СССР-ни Баш Советини бегими чыкъгъанын радио бла билдиредиле. Аны экинчи кюнюнде эрттенликде келсек, Бакуменколары кече бла юйюбюзню бош этип, кетип тура эдиле. Сейирге къалабыз алай терк кетип къалгъанларына.  Не букъдурур кереклиси барды, бек къууаннган эдик.

Ары дери уа атабызны гитче къарындашы Амаш урушдан тобугъунда да огъу бла, халкъыбызны кёчюргенлерин да билмей, 1945 жылда Яникойгъа къайтып келген эди. Аны да юйюнде тохтар амалы болмагъанды.

Насыпха, миллетибиз кесин сакълаялгъанды. Не къыйынлыкълагъа да чыдагъанды, тёзгенди. Энди аллайны бир инсан да сынамасын».