«Кёлюнг толмай тынгылаяллыкъ тюйюл эдинг»

Нальчикде Искусстволаны Шимал-Кавказ къырал институтуну маданият эмда искусствола колледжинде кишиликни дерси бардырылгъанды. Ол  Ленинград фашист ууучлаучуланы къуршоуундан эркин этгенли 80-жыллыгъына жораланнганды. Аны  Къабарты-Малкъарда «Патриот» жамауат биригиу  къурагъанды.

Тюбешиуге СКГИИ-ни студентлери бла преподавательлери, школчула да къатышхандыла.

Колледжни окъуучулары Ленинградны ол бушуулу кюнлерини юсюнден  презентацияларын кёргюзтгендиле,  докладларын  окъугъандыла. Дениза Бжекшиева  шахарны эмда шахарчыланы ол кюнледе жигитликлерини, кишиликлерини, дагъыда 

Ленинградны блокададан къалай эркин этилгенини юсюнден эсгериуле бла шагъырей этгенди. «Эки  миллиондан аслам адамгъа фашистле уллу азаплыкъ сынатхандыла. Болсада ленинградчыла, ачдан, сууукъдан не бек къыйналгъан эселе да, душманны аллында тобукъланмагъандыла, анга хорлатмагъандыла»,- деп чертгенди Дениза. 

Сатаней Османова уа ленинградчыла ол кюйсюз кюнледе къаллай бир  гыржын алгъаныны юсюнден хапарлагъанды.

Анастасия  Денисова да Ленинграддагъы блокаданы сынагъан, бюгюнлюкде  Нальчикде жашагъан Анастасия Зимницкая бла тюбешиуюню юсюнден айтханды. «Аны эсгериулерине жюрегин, къыйналмай, кёлюнг толмай тынгылаялмайса. Къыйынды аланы эшитген, адамла уа аны кеслери сынагъандыла! Алагъа тынгылай, быллай соруу келгенди акъылыма: «Быллай ачы хапарланы айтып, жаш адамланы жюреклерин къыйнаргъа керекмиди?» Анга жууапны да кесим бергенме: «Хау, керекди». Аллай зарауатлыкъны болдурмаз ючюн, биз тарыхыбызны билирге керекбиз»,- деп бошагъанды сёзюн Анастасия.

Тюбешиуге къатышханла ажымлы ёлген ленинградчыланы, аны къоруулай эмда эркин эте туруп жоюлгъан аскерчилени бир минутну шош сюелип эсгергендиле.

Ахырында «Патриот» жамауат биригиуню башчысы, профессор Эфендиланы Фуад сёлешгенди. Ол Кишиликни дерсине   келгенлени  хар бирине да ыспас этгенди, докладчылагъа да ыразылыгъын билдиргенди. «Бизни  Ленинградны  ол къыйын кюнлерин эмда  совет  солдатланы жигитликлерин унутуп къояргъа эркинлигибиз жокъду. Бизни аппаларыбыз, аталарыбыз да бюгюннгю жарыкъ, мамыр кюнюбюз ючюн жанларын, къанларын да аямагъандыла, биз аланы батырлыкъларына, чыдамлыкъларына баш ургъанлай турлукъбуз»,-деп чертгенди ол.

Андан сора «Непокорённые», «Блокада Ленинграда» деген документли  фильмле кёргюзтюлгендиле.