Окъуучула бла тюбешиу къурагъандыла

Республиканы окъуучулары КъМКъУ-ну «ПРОФСТАРТ» атлы биринчи профориентация магъаналы форумгъа жыйылгъандыла.  Ол университетни Минги тауну тийресиндеги окъуу-илму комплексини мурдорунда бардырылгъанды.  Тюбешиуню окъуу юйю вузгъа дери хазырланыу эмда усталыкъгъа тюшюндюрюу иш жаны бла управлениясы къурагъанды.

Форумгъа мектепледе окъуй тургъан отуз жаш бла къыз келгенди. Тюбешиуню чеклеринде ала къауумлагъа юлешиннгендиле эмда бюгюннгю студентле бла аланы кураторлары школчулагъа студент жашауну, ала къаллай усталыкълагъа юйрене тургъанларыны юслеринден хапар айтхандыла. Андан сора  да, алагъа лекцияла окъугъандыла, семинарла, квестле къуралгъандыла. Проректорну къуллугъун толтургъан Арсен Хараев а сабийлени сорууларына жууапла бергенди эмда кесини университетде окъуу жылларыны юсюнден хапар айтханды.

Экинчи кюнде уа жаш адамла медицина, криминалистика, инженер-техникалы ыз, робототехника эмда мехатроника бла байламлы майданлада университетни жетишимлерини юслеринден билирге онг тапхандыла. Андан тышында уа, алагъа 2024 жылда окъуугъа киргенде къаллай жангычылыкъла барлыкъларыны юслеринден да айтхандыла.

Билим бериу программадан сора да, сабийлеге солургъа онг да болгъанды. Ала, ингир сайын тематикалы чыгъармачылыкъ номерле къурап, кеслерини хунерлерин да кёргюзтгендиле.

Биринчи «ПРОФСТАРТ» жарыкъ халда бардырылгъанды. Аны  къурагъанла бери келген жашла бла къызла кесибизни университетибизге окъургъа келирле эмда быллай  тюбешиуле ахшы тёреге бурулурла деп ышанабыз.