Сууукъдан, къарангыдан да къутхаргъандыла

 Республиканы полициячылары жолда машиналары сыннган эки къызгъа болушхандыла, ачыкъланнганыча, ала Египетден къонакъладыла.

КъМР-де МВД-ны УГИБДД-сыны жол-патруль службасыны келечилери 12 январьда ингирде «Кавказ» трассаны Зольск районда кесегинде жолда жюрюуню къоркъуусузлугъу къалай жалчытылыннганын тинтген кезиуде, жол жанында тохтап, чыракълары жанып тургъан машинаны эслегендиле.

Полицияны капитаны Алим  Бугов бла лейтенант Аслан Тимижев  аны ичинде инсанлагъа болушлукъ керек болгъанын бла къалгъанын сурар мурат бла алайда тохтагъандыла. Ачыкъланнганыча, машинада эки къыз болгъандыла, ала Египетдендиле, Ставрополь крайда вузладан бирини студентлеридиле.   Жолда машиналары сынып, ала къоркъуулу болумгъа тюшгендиле.

Право низамны сакълаучулары  аланы патруль машинагъа олтуртуп, жылы чай бла сыйлагъандыла. Ызы бла жерине эвакуаторну чакъырып, транспортну, къызланы да жашагъан жерлерине ашыргъандыла.

 Къыйын болумдан къутхарылгъан къызла КъМР-де МВД-ны «ышаныулукъну» телефонуна сёлешип, инспекторлагъа къайгъырыулукълары   ючюн ыразылыкъларын билдиргендиле.