Жангы амалланы излегенлей турады

Кеслерине махтауну излемей, харкюнлюк ишлерин билгенлерича бардыра, окъутханларындан, бирсиледен да ыспас ала ишлеген педагогларыбыз кёпдюле. Аны алайлыгъына дайым да тюшюне, билим бериу, юйретиу жаны бла да аслам зат тюрлене, сурамла да ёзгере баргъан заманда сайлагъан усталыкъларына кертичилей къалып, аны бла бирге уа жетишимли болгъанлагъа бютюнда хурмет этесе.

Аллайларыбыздан бириди Тохаланы Маржан. Ишин тынгылы билгенинден сора да, огъурлу, жумушакъ ауазлы, ачыкъ ниетли таулу тиширыу. Не жумуш бла сёлешсенг да, бир заманда болушлугъун тийдирмей, ангылатмай да къоймаз.

Ол узакъ тау элибиз Бедикде туугъанды. Атасы Мажитни бла анасы Жаппуланы Лизаны уллу, шуёх юйюрлеринде ёсгенди. Ала уа жашларын бла къызларын иш юсюнде чыныгъыргъа, къайсы жумушдан да артха турмазгъа юйретгендиле. Кеслери да, «Эльбрусский» совхозда уруна, эл аллында юлгюге, хурметге да тийишли болгъандыла. Лиза «Сыйлылыкъны Белгиси» орден, «Коммунист урунууну ударниги» белги бла да эки кере да саугъаланнганды.

Мажит а сабийле окъуп, билим алырларына къайгъыргъанлай тургъанды. Ол къалай эсе да устаз усталыкъны башха тюрлю, энчи кёреди. Бютюнда тамата къызы ол жаны бла окъуса, ишлесе сюйгенди.

Маржан да, аны муратын толусунлай толтура, атасыны ышаныулугъуна да кертичилей къала, энди бюгюнлюкде билим бериуде къыркъ жылгъа жууукъ заманны ишлеп келеди. Жаш тёлюню юйретиуге бла окъутуугъа къошхан юлюшю ючюн «РФ-ни битеулю билим бериуюню сыйлы ишчиси» деген даражалы атха (2016 ж.) тийишли болгъанды.

Атасындан сора да, бу усталыкъгъа аны сюймеклигин кючлендирген устазы уа Елена Мухабовна болгъанды. Ол тарыхдан биринчи дерсин бергенинде окъуна, аны къалай къурай, теманы тынгылы ангылата билиую бла къызны жюрегинде педагогикагъа сейирни бютюн къозгъагъанды. Андан сора да, бу дерсден элни кесинде устаз болмагъаны да аны жарсытханлай, сагъышландыргъанлай тургъанды.

Алай бла, битеулю билим берген школну жетишимли бошап, Къабарты-Малкъар къырал университетни тарых-филология факультетини тарых бёлюмюне заочно киреди. Аны бла да къалмай, кеси тауусхан мектепде тарыхдан дерсле берип башлайды. Алгъадан белгилесек, ол бу элде окъутхан сабийледен энди бюгюнлюкде устазла болуп ишлегенле да бардыла. Сёз ючюн, Тилланы Фатима Абилевна – тарыхдан, Сотталаны Азнор Борисович а географиядан окъутхандыла. Бютюнда бег а ала экиси да Бедикни мектебинде устазла болгъанларын чертирчады.

Маржан Мажитовна туугъан элини школунда иги кесек заманны жетишимли ишлегенинден сора, къадары алай тюшюп, Нальчикни жыйырма жетинчи мектебине келеди. Анда да кёп жылны тарыхдан окъута, олимпиадалагъа, проектлеге къатыша, кесини керти да окъуулу, билимли устаз болгъанын ачыкълагъанлай тургъанды. Алай бла 2013 жылда «Билим бериу» федерал проектни чеклеринде «Къабарты-Малкъарны эм ахшы устазлары» проектге да баргъанды.

Анга хазырлагъан портфолиосунда уа 400 бет болгъанды. Ол ышан окъуна ачыкълап турады аны  къаллай педагог болгъанын. Нек дегенде, биз барыбыз да ангылайбыз, портфолиогъа устаз кеси окъутханланы жетишимлерин жыйышдырыргъа керек болгъанын. Аны себепли сагъынылгъан проектде хорлагъан да этгенди, диплом, ахча саугъа бла да белгиленнгенди.

Сабийле бла эришиулеге, олимпиадалагъа бара, алада жетишимлерини юслеринден айтсакъ, окъуучусу Атмырзаланы Мёлек тюрлю-тюрлю конкурсладан онсегиз дипломгъа тийишли болгъанды. Бюгюнлюкде уа ол врач болуп ишлейди.

Окъуучуларын  дагъыда КъМР-ни Парламентини башламчылыгъы бла жыл сайын бардырылгъан «Моя законотворческая инициатива» деген эришиулеге хазырлагъанлай турады. Анда уа Эмма Маркарян эки кере да алчы болуп, аланы экисин да дипломла бла саугъалагъандыла.

Шахар школда бирсилени арасында жетишимли бола, иш кёллюлюгюн ачыкълап уруна, ол 2016 жылда мектепни директоруну окъутуу жаны бла орунбасарына да салыннганды. Андан бери уа школну кёрюмдюлери иги да тюрленнгендиле. Бир къырал сынаулада жюз балланы бешеулен алгъандыла. Окъуучуланы битеуроссей дерс олимпиадалары бла байламлы эсеплени айтсагъ а, Нальчикни мектеплерини арасында ала анда жетишимлери бла ючюнчю жердедиле. Энди мекямгъа 2026 жылда тынгылы ремонт да этилликди деп сакълайдыла.

Эки минг чакълы сабий жюрюген шахар школда завуч болгъан тынч жумуш болмагъанын къайсы бирибиз да ангыларыкъбыз. Бютюнда бюгюнлюкде, бу жаны бла тюрлениуле кёпден-кёп бола баргъан кезиуде. Алай эсе да, Маржан Мажитовна окъуучуланы, ата-аналаны, мектепни башчыларыны жанындан да ыспасха, хурметге тийишли болады. Директор Мадина Асланбековна  Шериева да аны ишин къалай бардыргъанына ыразыды. Бир бирлери бла келишиулюкде, биригиулюкде ишлей, школ жашауну  бютюн зауукълу, жетишимли да болуруна къайгъырадыла.

– Ахшы жанына тюрлениуле аслам болуп, жаш адамла устаз усталыкъны сайлап, мектепледе ишлеп тебиреселе сюерик эдим. Билимлерин, ангылауларын ёсюп келген тёлюню окъутууда хайырлансала. Аллайларыбыз а бардыла, къудуретни ахшылыгъындан. Окъуугъа-билимге, ишде жетишимли болургъа итиннгенлерибиз асламдыла, – дейди ушакъ нёгерим кеси уа.

Аны бош заманы аз къалады. Болсада миллет адабиятны окъургъа сюеди. Толгъурланы Зейтунну «Къызгъыл кырдыкларын», Шауаланы Миналданны «Отлукъ ташларын» энчи кёреди. Акъ сёзде уа закийибиз Къулийланы Къайсынны, Отарланы Керимни назмуларын багъалайды. Тарых магъаналы чыгъармалагъа сейири уа, сабийлигиндеча, теренлей къалады. Ёсюп келген тёлюге аны тийишлисича юйретир, тарых шартланы кертилиги бла ангылатыр ючюн, жангы амалланы излегенлей да турады.

Ол ишден бош заманын атасы Мажитни къатында оздурургъа излей, элге ашыгъады. Энди токъсан жылына жууукълашхан къарт да юйюрюню, туудукъларыны жетишимлерине къууанады. Маржанны уа, андан сора да, элде къарындашдан туугъан Айлин бла Амира да сакълайдыла. Айлин а, ата эгечине ушап, устаз боллукъма дегенлей турады. Алай эсе уа, юйюрню жангы тёлюсюнде да педагогикагъа юлюшлерин къошарыкъла боллукъгъа ушайды. Аны алайлыгъы уа, айхай да, Маржан Мажитовнаны адамлыкъ, усталыкъ жаны бла да ышанларын, даражасын да ачыкълайды.