«Автобытсервис» - эм игилени тизмесинде

 Кёп болмай Прохладный  шахар округну администрациясыны башчысы  Вячеслав Архангельский «Иш кёллю Россей» жамауат организацияны Къабарты-Малкъарда бёлюмюню келечисине «Автобытсервис» предприятияны таматасына  Владислав Можгиннге  «2023 жылда Эм иги предприятие» деген Шагъатлыкъ къагъытны бергенди. Аны бла бирге биригиу башхалагъа юлгю болурча  Прохладный шахар округну Сыйлы  къангасында жерин тапханды.  

 Владислав Можгин биригиуге 2004 жылдан бери таматалыкъ этеди. Предприниматель кесин билимли, сынамлы, иш кёллю, мадарамлы оноучуча белгили этгенди. Аны башчылыгъында  предприятие иги да айныгъанды эм бюгюнлюкде  регионда эм жетишимлиледен бирине саналады.

Компания кёбюсюнде женгил машиналагъа керек темирлени эм башха затланы  сатып   кюрешеди. Ол «Grass», «Motul», «Splat», «Делфи Групп Компания» эм башха белгили биригиулени дилериди.  Аны автосервислери женгил машиналагъа ремонт этгенлеринден сора да, ишлерине гарантия бередиле. Аланы Къабарты-Малкъардан тышында Шимал Кавказны регионларында да табаргъа боллукъду. 

Владислав Можгин жамауат ишге да тири къатышады. «Иш кёллю Россей» жамауат организацияны, КъМР-ни Башчысында  эксперт-аналитика советини, Россейни эркин экономика жамауат организациясыны президиумуну келечисиди, КъМР-ни предпринимательлерини  эркинликлерин къоруулау жаны бла уполномоченныйни Прохладный шахарда болушлукъчусуду. «Усталаны шахары деген» уллу проектни авторуду.

Кёп жылланы ичинде предприятие  жандауурлукъ проектлеге эм  волонтёр акциялагъа    тири  къошумчулукъ этеди. Ол санда энчи аскер операциягъа къатышханлагъа, абаданлагъа, къолайсыз юйюрлеге, мектеплеге, сокъурланы биригиулерине, килисалагъа, социал къоруулау аралагъа болушлукъ тапдырады. Андан сора да, КъМР-ни «Мени бизнесим» арасы бардыргъан  акциялада да айырмалыгъын ачыкъламай къоймайды.