Чемпионланы отуз жылдан бери хазырлайдыла

Элбрус районну олимпиада резервли спорт школу  ишлегенли отуз жыл толгъанды. Гёжефлерини жетишимлерине кёре ол жангыз да Шимал Кавказда угъай, саулай къыралда эм игилени санына киргенди. Учреждение битеуроссей эришиуледе эки кере хорлагъанды, аслам грантла къытханды, Россейни спорт министрини Ыразылыкъ къагъытына тийишли да болгъанды.

Аны тарыхы уа 1993 жылда башланады, ол заманда Тырныауузну комбинатыны «Баксан» эм «Геолог» спорт аралары муниципалитетге ётдюрюлген эдиле, аны бла байламлы шахарны властьланы аланы мурдорларында спорт школ къураргъа оноу этгендиле. Аны юсюнден башламчылыгъ а физкультура эм спорт комитетни башчысы Жаппуланы Магометден келгенди, аны мураты уа районда спортну айнытыргъа, гёжефле даражалы эришиуледе атларын айтдырырча этерге эди.

- Болгъан объектле да хайырланылып, каратеден, боксдан, ауур атлетикадан, футболдан, волейболдан бла баскетболдан бёлюмле ачылгъандыла, - дейди школну директору Чеченланы Арсен. – Анда спортчуланы хазырларча битеу онгла болгъандыла. «Геологда» боксдан, каратеден бла спортну оюн тюрлюлеринден энчи залла алгъадан да ишлегендиле. Ауур атлетчиле уа жарауларын шахар стадионну трибунала тюбюнде отоуунда бардыргъандыла. Бир кесекден ауур атлетикадан битеу керекли оборудованиясы бла зал хазыр болгъанындан сора аланы ары кёчюргендиле.

Тынгылы онгла къуралгъанларыны хайырындан жетишимле да кёслерин кёп сакълатмагъандыла. Сергей Криваковскийни къолунда юйреннген каратечиле биринчи майдалларын келтиргендиле: Владимир Хашев Европаны биринчилигини биринчи призёру болгъанды, Уяналаны Аслан, Россейни жыйымдыкъ командасыны къауумунда сермеше, Европада экинчи жерге чыкъгъанды. Хорламла бла Евгений Могилевец, Антон Чурюковский, Аслан Кокаев, Артур Байбеков, Акъбайланы Анзор, Арсен Губашиев, Алим Эминов, Артур Дударов, Расул Куготов, Галия Абулькина эм башхала къууандыргъандыла. Энчи Аслан Губашиевни белгилерге тийишлиди – 1996 жылда, россейли каратечиледен биринчи болуп, ол дунияны чемпионатында хорлагъанды. Руслан Сижажев къыралда эм кючлю болуп тургъанды, Европаны призёрланы санына киргенди, 2002 жылда Россейни эм иги каратечисине саналгъанды. Спортну халкъла аралы устасы деген сыйлы ат Аслан Губашиевге, Уяналаны Асланнга, Антон Чурюковскийге, Аслан Кокаевге, Руслан Сижажевге берилгенди.

Каратеден бёлюм артда жыллада да ишин жетишимли бардыргъанды. Жараулагъа башчылыкъ этген Евгений Могилевец Россейни спортуну талай устасын хазырлагъанды, анда юйреннген Тебуланы Тау-Бек бла Мырза-Бек, Рустам Нахушев эришиуледе хорлагъанланы санына къошулмай хазна къалмайдыла. Тренер Руслан Нахушевде юйреннген Керим Алихаджиев бла Андрей Вихорь кеслерини ауурлукъларында къыралны чемпионатларында хорлагъандыла, Россейни жыйымдыкъ командасыны санында дунияны чемпионатына къатышыргъа эркинликни къоруулугъандыла, ол а быйыл Индонезияда Джакарта шахарда боллукъду.

Россейни сыйлы тренери Маккаланы Махти да кёп кючлю штангачыны юйретгенди. Ала къырал, халкъла аралы эришиуледе хорлай келедиле. Чингиз Дахкильгов Европаны жаш тёлю биринчилигинде саугъа жерге чыкъгъанды. Ауур атлетика бла къызла да тири кюрешген кезиуде Османланы Земфира, Эльджоракъланы Олеся, Оксана Бессонова, Залина Кулова атларын айтдыргъандыла, спортну усталары болгъандыла, Рагнета Карданова уа спортну халкъла аралы устасы деген атны да алгъанды. 2000 жыллада уа Аккайланы Хаджимурат, Созайланы Мухаммат бла Василий Половников белгили болгъандыла. Хаджимурат юниор кезиуде да умутландыргъанды, дунияны чемпионатында хорлагъанды, эки Олимпиадада майдалла къытханды. Василий Половников Европаны рекордсмениди, дунияны бла къыралны чемпионатларында майдалла къытханды. Созайланы Мухаммат дунияны кюмюш призёруду, даражалы эришиуледе хорламлары бла Геккиланы Таукъан да къууандыргъанды. 

Атлетлени аланы ызларындан келген тёлюлери да жетишимлери бла ёхтемлендиргендиле, ол санда Георг Датиев, Къудайланы Джамал, Мурат Тамазов, Доттуланы Харун эм башхала. Бюгюнлюкде жаш атлетле бла Муаед Шаов ишлейди, къысха заманны ичинде ол Россейни спортуну жети устасын хазырлагъанды: Ёзденланы Муратны, Алим Шогеновну, Аслан Каскуловну, Альберт Киповну, Гюлюйланы Расулну бла Тамерланны, Алина Малухованы.

Спорт школ ачылгъан кюнледен башлап боксдан тренер Муаед Дышеков къырал, халкъла аралы даражада да хорламлы спортчуланы юйретеди. Аны къолунда жарау этип, спортну устасы деген атны биринчи болуп Виталий Майоров къоруулагъанды, ол къыралны биринчилигинде хорлагъан эди. Россейде биринчиле дагъыда Алибек Газов бла Замир Темиров болгъандыла. Къумыкъланы Юсюп а Европада да финалгъа чыкъгъанды. Бусагъатда юйреннген боксчуладан ахшы Гыжгыланы Юсюп, Макытланы Хасан, Алийланы Малик, Джаппуланы Залим сермешедиле.

Алай бла, битеулю эсеплени келтиргенде, школда юйреннгенлени санында Спортну сыйлы устасы, спортну халкъла аралы 15 устасы, спортну 60-дан аслам устасы, биринчи разрядланы аслам алгъан атлет бардыла. Юч тренерге «Россейни сыйлы тренери» деген ат берилгенди. Талай тренер бла спортчу къырал саугъалагъа тийишли болгъандыла, физкультураны эм спортну сыйлы къуллукъчусу деген атланы алгъандыла.